अविरल वर्षाका कारण सुदूरपश्चिम प्रदेशको राजधानी धनगढी डुबानमा परेको छ । धनगढीकाे मुख्य बजारसहित नगरका अधिकांश क्षेत्र जलमग्न भएका छन् । धनगढीको एलएन चोक, प्रदेश सभा भवनअगाडि, पार्कमोडलगायत मुख्य बजार क्षेत्र डुबानमा परेका हुन् । सडकमा पानी जमेपछि आवत–जावतमा समस्या भएको छ ।
डुबान भएका क्षेत्रमा पसलहरू खुल्न सकेका छैनन् । धनगढीको शिवनगर, विशालनगर, मिलनचोक, उत्तरबेहडी, चटकपुरलगायत क्षेत्र डुबानमा परेका छन् ।
कतिपय ठाउँमा घरभित्रै पानी पसेको छ । बजार क्षेत्रमै घुँडामाथि पुग्ने पानी जमेपछि आवागमनमा समस्या भएको छ । कतिपय सरकारी कार्यालय परिसर जलमग्न भएपछि सेवा प्रभावित भएको छ ।
नगरका खोलानालामा बाढीको सतह अत्यधिक बढेको छ । खोलानाला अतिक्रमण गरेर संरचनाहरू बनाउँदा धनगढी डुबानमा पर्न थालेको स्थानीय सेबिसिंह रानाले बताए ।
धनगढी वर्षायाममा हरेक वर्ष डुबानमा पर्ने गरेको छ । मुख्य बजारकाे बीचमा पर्ने कैलाली नाला र सुकुटी नालाको अधिकांश ठाउँमा अतिक्रमण गरेर घरहरू निर्माण गरिएका छन् ।
मुख्य बजारको एलएनचोकदेखि प्रदेश सभा भवन अगाडिसम्मको क्षेत्रमा पानी जमेर तलाउजस्तै भएको छ । मुख्य बजारमै पर्ने रातोपुल क्षेत्रमा पनि सडक जलमग्न बनेको छ । वर्षाले कैलालीको भजनी नगरपालिका र कैलारी गाउँपालिका पनि डुबानको जोखिममा परेको स्थानीयले बताए ।