लमजुङमा एक सय नाैजनाले कोरोना भाइरसलाई जितेका छन्। संक्रमित एक सय ११ जनामध्ये एक सय नाैजनाले कोरोना जितेका हुन् । उनीहरू भारतलगायत विभिन्न देशबाट आएर आइसोलेसनमा बसेका थिए ।
कोरोना निको हुनेमा सयजना पुरुष र नाैजना महिला छन् । कोरोनालाई जितेसँगै उनीहरूलाई घर पठाइएको प्रमुख जिल्ला अधिकारी कृष्णप्रसाद शर्माले बताए ।
शर्माका अनुसार शनिबार मात्रै १० जनाले कोरोना जितेका छन् । कोरोना निको हुनेमा बेसीसहर नगरपालिका– ९ का २३ वर्षीय पुरुष, मध्यनेपाल नगरपालिका– २ का २५ वर्षीय पुरुष, सुन्दरबजार नगरपालिका– ७ का ३६ वर्षीय पुरुष, क्व्होलासोंथर गाउँपालिका– ६ का २९ वर्षीय पुरुष, बेसीसहर नगरपालिका– १ र ११ का ३४ वर्षीय, ५१ वर्षीय, ३० वर्षीय र ३८ वर्षीय पुरुष रहेका छन् ।
यस्तै सुन्दरबजार नगरपालिका– ६ का ३० वर्षीय पुरुष, दोर्दी गाउँपालिका– १ का ४१ वर्षीय पुरुष रहेका छन् । उनीहरू सहरी विकासको भवन, सहजी आइसोलेसन र नमुना सामुदायिक अस्पताल सुन्दरबजारको आइसोलेसनमा बसेका थिए ।
अब आइसोलेसनमा दुईजना पुरुष मात्र छन् । उनीहरूको नमुना सामुदायिक अस्पताल सुन्दरबजारमा उपचार भइरहेको र अवस्था सामान्य रहेको प्रजिअ शर्माले बताए ।