पर्सामा शनिबार राति थप ७५ जनामा कोरोना संक्रमण देखिएको छ । नारायणी अस्पतालको प्रयोगशालामा शनिबार राति गरिएको पिसिआर परीक्षणमा १५ महिलासहित ७५ जना संक्रमित थपिएको नारायणी अस्पतालका मेसु डा. मदन उपाध्यायले जानकारी दिए ।  

उनका अनुसार कोरोना पुष्टि हुनेमा १२ वर्षीय बालकदेखि ६८ वर्षका वृद्धसम्म छन् । थपिएका संक्रमितमध्ये ७० जना वीरगन्ज महानगरपालिका र पर्साकै विभिन्न स्थानीय तहका छन् भने बाँकी बाराका दुई, सर्लाहीका दुई र एक भारतीय नागरिक रहेका छन् ।  

पर्सामा हालसम्म एक हजार १५ जनामा कोरोना संक्रमण देखिएको छ । अहिलेसम्म काेरोनाका कारण २१ जनाको मृत्यु भएको छ । साउन यता १७ जनाको मृत्यु भएको डा. उपाध्यायले बताए ।