काठमाडौं महानगरपालिकाका मेयर विद्यासुन्दर शाक्यले कोरोना संक्रमणबाट आफैँ सचेत हुन नागरिकलाई सुझाब दिएका छन् । काठमाडौंको श्रीघः स्थित धर्मकीर्ति बिहारमा आयोजित कार्यक्रममा उनले भने, ‘यस्तो वेला सरकारले चाहेर पनि केही गर्न सक्ने अवस्था छैन, आफ्नो ख्याल आफैँले गर्नुपर्छ । मास्क लगाउनु आफू सुरक्षित हुनलाई मात्र होइन, अरूलाई सुरक्षित गर्नलाई पनि हो । यस्तो वेला स्वास्थ्य प्रोटोकल पालना गर्नु नै मुख्य कुरा हो ।’
उनले हरेक परीक्षणमा प्रतिव्यक्ति १० हजार नेपाली रुपैयाँ खर्च भइरहेको भन्दै पिसिआर परीक्षण मात्रै कोरोनाको समाधान नभएको बताए । उनले भने, ‘आवश्यकताअनुसार परीक्षण गर्नुपर्छ, तर पिसिआर परीक्षण नै यसको औषधिचाहिँ हाेइन ।’ उनले रोग लागेपछि पछुताउनुभन्दा पहिल्यै स्वास्थ्य मापदण्ड पालना गरेर सहयोग गर्न आग्रह गरे ।