भयानक ठुलो क्षति गर्ने विस्फाेटन खेपेका लेबनानको राजधानी बेरुतका सर्वसाधारण अन्ततः सरकारविरुद्ध सडकमा ओर्लेका छन् ।
प्रदर्शनमा उत्रेका सर्वसाधारण र सुरक्षा फैजबीच झडप भएको अन्तर्राष्ट्रिय समाचार संस्था बिबिसीले जनाएको छ ।
त्यहाँको संसद भवन नजिकै अश्रुग्यास प्रहार गरी स्थितिलाई नियन्त्रणमा लिएको सुरक्षा अधिकारीहरुले जनाएका छन् ।
गत मंगलबार बेरुतमा भयानक ठुलो विस्फाेट भएकाे थियाे । विस्फाेटमा परेर कम्तिमा एक सय ३७ जनाको मृत्यु भएको थियो भने पाँच हजारभन्दा बढी मानिसहरु घाइते भएका थिए ।
२ हजार ७ सय ५० टन अल्मोनियम नाइट्रेड असुरक्षित तरीकाले भण्डारण गरेकाे गाेदाममा विस्फाेट हुँदा बेरुत सहर नै कम्पायमान हुन पुगेको थियो ।
उक्त अल्मोनियम नाइट्रेड ६ वर्ष अघिदेखि उक्त स्थानमा अत्यन्त असुरक्षित तरीकाले भण्डारण गरि राखिएको थियो ।
उक्त घटनामा दोषी भएको आरोपमा १६ जनालाई हिरासतमा लिएर अनुसन्धान गरिरहेको त्यहाँका सरकारी अधिकारीहरुले जनाएका छन् ।
लेबनानका जनताहरु भने भ्रष्ट सरकार र भ्रष्ट सरकारी अधिकारीहरुको गैरजिम्मेवारपनाका कारण यस्तो भयानक अवस्था आएको भन्दै बिरोधमा उत्रेका हुन् ।