विराटनगर महानगरपालिका– ६ की ९० वर्षीया मधुदेवी भट्टराई कोरोनामुक्त भई बुधबार अस्पतालबाट डिस्चार्ज भएकी छिन् । उनी १० साउनमा कोसी अस्पताल कोभिड– १९ उपचार केन्द्र विराटनगरमा भर्ना भएकी थिइन् ।
कोसी अस्पतालका मेडिकल सुपरिटेन्डेन्ट डा. चुमनलाल दासका अनुसार मधुदेवी मधुमेह, उच्च रक्तचाप र नसासम्बन्धी रोगबाट पीडित थिइन् । उपचार केन्द्रमा भर्ना भएको १० दिनपछि स्वाब परीक्षण गर्दा नेगेटिभ रिपोर्ट आएपछि उनलाई डिस्चार्ज गरेको मेसु दासले बताए । उनलाई प्रदेश १ सामाजिक विकासमन्त्री जीवन घिमिरेले पुष्पगुच्छा दिएर बिदाइ गरे ।
मधुदेवीसँगै उनकी बुहारी पनि डिस्चार्ज भएकी छिन् । पिसिआर परीक्षणका क्रममा वृद्धासँगै छोरा, बुहारी र नातिमा पनि संक्रमण देखिएको थियो । छोरा र नाति अझै उपचार केन्द्रमा उपचाररत छन् । बुधबार कोसी कोभिड–१९ उपचार केन्द्रबाट २१ जना डिस्चार्ज भएका छन् ।