- वि.सं २०८१ बैशाख १३ बिहीबार
बुद्ध एयरको एटिआर ७२, ५०० सिरिजको जहाजले बाराको सिमरा विमानस्थलमा परीक्षण उडान गरेको छ । बुधबार काठमाडौंबाट १७ जना प्राविधिकसहितको टोली लिएर बारा आएको बुद्धको जहाजले दक्षिण र उत्तर गरी दुवैतर्फबाट उडान तथा अवतरण गरी सफलतापूर्वक परीक्षण उडान गरेको विमानस्थल कार्यालय, सिमराका प्रमुख वसन्त गौतमले बताए ।
यसअघि बुद्धका एटिआर ४२, ३२० सिरिज र बिच १९ डी एयरक्राफ्टले मात्र सिमरा विमानस्थलमा सेवा प्रदान गरिरहेका थिए । चैत ११ गतेअघि दैनिक सातवटा सेड्युलबाट नियमित उडान गर्दै आएको बुद्धले भदाै १ गतेदेखि हुने उडानका लागि ७२ सिटे एटिआर ७२ ले उडान भर्न लागेको बुद्ध एयर सिमरा कार्यालयले जनाएको छ ।
नेपालकै सबैभन्दा पुरानो सिमरा विमानस्थलको लम्बाइ ११९० मिटर रहेको छ । औद्योगिक करिडोर र भारतीय पर्यटकका लागि काठमाडौं छोटो दूरीको उडानका कारणसमेत सिमरा विमानस्थल सधैँ भिडभाड हुने गर्दछ ।
चैत ११ गते अघि तीन हजार एक सय २० रुपैयाँ भाडादर तय गरेको बुद्धले भदौ १ गते देखि काठमाडौं–सिमरा उडानका लागि दुई हजार नौ सय पाँच रुपैयाँ भाडादरसमेत तय गरेको बुद्ध एयर सिमराका प्रमुख सुरेश रेग्मीले जानकारी दिए ।
सिमरा विमानस्थलले सामाजिक दूरीदेखि सुरक्षाका अन्य कार्यको समेत पूर्ण तयारी गरेको जनाएको छ । बुद्ध एयरबाहेक नेपाल एयरलाइन्स र श्री एयरलाइन्सले समेत काठमाडौं–सिमरा उडान भर्दै आएका छन् ।
