- वि.सं २०८१ बैशाख १३ बिहीबार
मंगलबार राति आएको हावाहुरीसहितको पानीका कारण जिल्लाको सम्पूर्ण विद्युत् सेवा अवरुद्ध भएको छ ।
राति हावाहुरीसहित परेको पानीले ठाउँठाउँमा रूख ढलेका कारण मुख्य लाइन नै बन्द भएको नेपाल विद्युत् प्राधिकरण लालबन्दी वितरण केन्द्रका प्रमुख सुधीरकुमार रायले बताए ।
सर्लाहीमा ल्याइएको ३३ हजार केभीको प्रसारणलाइनमा रूख ढलेको कारण मर्मतको काम भइरहेको प्रमुख रायले बताए ।
‘रौतहटस्थित सवस्टेसनबाट लामो जंगलको बाटो हुँदै विद्युत् ल्याइएको छ,’ उनले भने, ‘राति आएको हावाहुरी र पानीले ठाउँठाउँमा रूख तारमा परेकोले विद्युत् अवरुद्ध भएको हो ।’
रातिदेखि नै मर्मतको लागि प्राविधिकहरू खटिसकेकाे जिल्ला विद्युत् प्राधिकरण मलंगवाले जनाएको छ ।
हावाहुरीले धेरै स्थानमा क्षति गरेकोले मर्मतका लागि समय लाग्न सक्ने प्राधिकरण शाखा कार्यलय बरहथवाले जनाएको छ ।
कमजोर संरचना र कम क्षमताको विद्युत् प्रसारण लाइनका कारण जिल्लामा सामान्य हावा तथा पानीको कारणसमेत लामो समय विद्युत् अवरुद्ध हुने गरेको छ ।
मंगलबारबाट तराईको जिल्लामा बढेको तापक्रमका कारण आकुल– व्याकुल बनेका जिल्लावासी विद्युत् अवरुद्ध बनेपछि थप समस्यामा परेका छन् ।
जिल्लामा गएरातिबाट विद्युत् बन्द भएपछि ठाउँठाउँमा मोबाइल फोनको नेटवर्कमा समेत समस्या आउन थालेको छ ।
रिपिटर टावरहरूमा रहेका ब्याट्री ब्याकअप नभएको र चार्जको लागि लाइनसमेत नभएका कारण मोबाइल फोनमा नेटवर्क नआउने, आए पनि स्पष्ट कुरा हुन नसक्ने समस्या देखिएको नेपाल टेलिकम मलंगवा कार्यलयले जनाएको छ ।
विद्युत अवरुद्ध भएका कारण मोबाइल फोन चार्ज गर्नसमेत नपाएका सर्लाहीको बागमती नगरपालिका–११ निवासी रमेश काफ्लेले बताए ।
आफन्तसँग फोन सम्पर्क गर्नसमेत समस्या भएको काफ्लेले गुनासो गरे ।
जिल्लामा सामान्य समयमा समेत अनधिकृत रूपमा विद्युत् कटौती हुने तथा पटकपटक विद्युत् आउने–जाने गर्ने गरेको कारण जिल्लावासी आजित भएका छन् ।
यसरी छिनछिनमा विद्युत् आउने–जाने गरेका कारण अनलाइन कक्षा लिने गरेका विद्यार्थीहरू ठूलो मारमा परेका छन् ।
