पर्सामा कोरोना संक्रमणको जोखिम उच्च रहेकाले अनिश्चितकालका लागि निषेधाज्ञा जारी छ । जिल्ला प्रशासन कार्यालय पर्साले कोरोना संक्रमण रोकथाम तथा परिक्षणको दायरा बढाउन अनिश्चितकालीन निषेधाज्ञा जारी राखेको हो ।
जिल्लामा पछिल्लो समय कोरोना भाइरस (कोभिड–१९) संक्रमितबाट मृत्यु हुनेको र नयाँ संक्रमितको संख्या निरन्तर बढिरहेकाले अनिश्चित निषेधाज्ञा जारी गरेको जनाएको छ ।
तर, यही समयमा जिल्लामा तस्करी भने बढेकाे पाइएको छ । सशस्त्र प्रहरी बेस क्याम्प पोखरियाले बुधबार बिहान तस्करी भइरहेकोे ३६ किलो चरेस बरामद गरेको छ ।
बिहानै गस्तीमा निस्किएका सशस्त्र प्रहरीलाई देखेपछि तस्करले भारततर्फ लगिरहेको चरेस खेतमा फालेर भागेको पोखरिया बेस क्याम्पका सशस्त्र प्रहरी निरीक्षक हरित बडुवालले जानकारी दिए ।
प्रहरी निरीक्षक बडुवालले विशेष सुराकीका आधारमा नगरपालिकाको– २ झाखराबाट बिहान ४ बजे सशस्त्रको टोलीले ठूलो परिमाणमा चरेस बरामद गरेको बडुवालले बताए । बरामद भएको चरेस ७० प्याकेटमा राखिएको ३६ किलो रहेको उनले बताए ।