एसिडपीडित मुस्कान खातुनले अपराधीले आफ्नो मुख जलाए पनि सपना नजलाएको भन्दै आफ्नाे सपना प्राप्तिमा निरन्तर लागिरहने बताएकी छिन् ।
संसद्को महिला समितिको बैठकमा सोमबार खातुनले भनिन्, ‘यो देशमा केेही गर्ने रहर छ, सपना छ । एसिड छ्यापेर अपराधीले मेरो अनुहार जलाए, तर सपना जलाउन सकेको छैन। यो देशमा बसेर केही गर्ने सपना अझै पनि छ।’
खर्चको अभावमा अहिले पनि समस्या भइरहेको उनको भनाइ थियो । डाक्टरले दैनिक चार–पाँचपटक औषधि लाउनुपर्छ भने पनि खर्चको अभावले एकपटक मात्रै लगाउने गरेको उनले बताइन् ।
उनले भनिन्, ‘खर्चको समस्या धेरै छ । सबैभन्दा ठूलो पीडा त मेरो आमाबुबालाई हुन्छ । आफ्ना छोराछोरीलाई यो रूपमा देख्दा उहाँहरूलाई निकै गाह्राे हुन्छ ।’