मोरङको बुढीगंगा गाउँपालिका– १ करैया टोलका बासिन्दा र प्रहरीबीच बिहीबार राति दोहोरो झडप हुँदा एक दर्जन मानिस घाइते भएका छन् ।
स्थितिलाई नियन्त्रणमा लिन प्रहरीले दुई राउन्ड हवाई फायर पनि गरेको थियो ।
लागुऔषध गाँजा बिक्री गर्ने गरेको सूचना पाएर बिहीबार राति करैया बस्तीमा पुगेको प्रहरी र स्थानीयबीच विवाद हुँदा झडप भएकाे हाे । झडपमा तीनजना प्रहरी र एक दर्जन स्थानीय घाइते भएका हुन् ।
झडप भएपछि स्थिति नियन्त्रणमा लिन प्रहरीले पेस्तोलबाट दुई राउन्ड हवाई फायर गरेको थियो ।
झडपमा पहरी जवान ज्ञानबहादुर बस्नेत, जीवन काफ्ले र श्रवण चौधरी घाइते भएका छन् । उनीहरूको विराट मेडिकल कलेज टिचिङ अस्पतालमा उपचार भइरहेको छ ।
घाइते भएका स्थानीयहरू भने प्रहरीले पक्राउ गर्ने डरले सार्वजनिक भएका छैनन् । एक दर्जन स्थानीयको हात, खुट्टा र टाउकोमा चोट लागेको बताइएको छ ।
स्थानीयलाई उकासेर प्रहरीमाथि आक्रमण गरी अनुसन्धानमा बाधा पुऱ्याएको अभियाेगमा पाँचजनालाई प्रहरीले पक्राउ गरेकाे छ । महादेव, बलराम, चन्देश्वर, वीरेन्द्र र देव ऋषिदेवलाई अनुसन्धानका लागि नियन्त्रणमा लिएको मोरङका एसपी सन्तोष खड्काले बताए ।
हवाई फायर गरेर स्थिति नियन्त्रणमा लिन नसकेको भए घटनामा धेरै मानवीय क्षति हुन सक्ने प्रहरीले जनाएको छ ।
एसपी खड्काले लागुऔषध कारोबारीहरूलाई पक्राउ गर्न पुगेको प्रहरी टोलीमाथि स्थानीयलाई अघि सारेर आक्रमण गर्न लगाइएको उनले बताए ।
स्थानीयका अनुसार राति छोटु भन्ने व्यक्तिको किराना पसलमा झोला माग्दै सादा पोसाकका प्रहरी पुगेका थिए ।
सोही क्रममा उनीहरूबीच विवाद भएको थियो । विवाद बढेपछि थप मद्दतका लागि प्रहरी बोलाएर गालीगलौज गर्ने, हेल्मेटले कुट्ने र ज्यान मार्ने धम्की दिएको स्थानीयको आरोप छ ।
त्यसपछि उत्तेजित भएका गाउँलेले घरेलु हतियार रड, भाला, खुकुरी निकालेर प्रहरीसँग प्रतिकार गर्न खोजेका थिए ।
त्यसपछि उत्पन्न परिस्थिति नियन्त्रणमा लिन प्रहरीले पेस्तोलबाट दुई राउन्ड हवाई फायर गरेको थियो ।
प्रहरीले भने लागुऔषध गाँजाको कारोबार हुने भएकाले अनुसन्धान गर्न आफूहरू पुगेको जनाएको छ ।
घटनास्थलबाट प्रहरीले लागुऔषध गाँजा भने बरामद गरेको छैन ।