वीरगन्जकी महिलाले आइसाेलेसनमै बच्चा जन्माइन्
वीरगन्ज– १ छपकैयाकी ३१ वर्षीया कोरोना संक्रमित महिलाले आइसोलेसनमै बच्चा जन्माएकी छिन् । शुक्रबार नारायणी अस्थायी गण्डक कोभिड अस्पतालमा उपचाररत महिलाले आइसोलेसनमै बिहान ४ बजे छोरी जन्माएकी हुन् ।
कोरोना संक्रमित आमा र शिशु दुवैको स्वास्थ्य अवस्था सामान्य रहेको कोभिड अस्पतालका डा. उदयनारायण सिंहले जानकारी दिए। उनका अनुसार संक्रमित महिलालाई बिहीबार कोरोना संक्रमण पुष्टि भएको थियो ।
संक्रमित महिला बिहीबार साँझ सुत्केरी गराउन मेडिकल कलेजमा भर्ना भएको खबर पाएपछि कोभिड अस्पतालका चिकित्सकले राति नै उनलाई एम्बुलेन्समा राखेर कोभिड अस्पतालमा ल्याएका थिए ।
बिहान नवजात शिशुको स्वाब संकलन गरी पिसिआर परीक्षणका लागि नारायणी अस्पतालको प्रयोगशालामा पठाइएको सिंहले बताए ।