चोरी गरिएका ३३ थान मोबाइल जिल्ला प्रहरी कार्यालय लमजुङले विशेष अनुसन्धानपश्चात् फेलापारेको छ । प्रहरीले फेलापारेको ३३ थान मोबाइलमध्ये २९ थान सोमबार मोबाइलधनीलाई बुझाएको छ ।
जिल्ला प्रहरी कार्यालय लमजुङका प्रमुख डिएसपी गंगाबहादुर थापाले चार लाख ८० हजार पाँच सय मूल्यबराबरका चोरी भएका मोबाइल सम्बन्धित धनीलाई फिर्ता गरेको बताए ।
बेसीसहर नगरपालिका– ७ का सुरज तामाङले कतारमा हुँदै खरिद गरेको मोबाइल घर आएको केही दिनमा घरैबाट हराए । उनले मोबाइल खोज्न जिल्ला प्रहरी कार्यालय लमजुङमा निवेदन दिएको ६ दिनमै मोबाइल पाए । प्रहरीले ६ देखि ११ साउनसम्म चोरीका ३३ थान मोबाइल फेलापारेको डिएसपी थापाले बताए ।
प्रहरीका अनुसार जिल्ला प्रहरी कार्यालय लमजुङले आर्थिक वर्ष २०७५/०७६ मा ७ थान मोबाइल फेला पारेर फिर्ता गरिदिएको थियो । यस्तै आर्थिक वर्ष २०७६/०७७ मा ६ थान मोबाइल सम्बन्धित धनीलाई फिर्ता गरेको थियो ।