भारतको केन्द्र सरकारले कोभिड– १९ को महामारी सकिएपछि कालापानीलगायतका विषयमा नेपालसँग वार्ता गर्ने बताइरहेका वेला सीमावर्ती धार्चुला प्रशासनले भने नेपाली प्रशासनलाई चिठी पठाएर कालापानीदेखि लिम्पियाधुरासम्मकाे सबै जमिन दाबी गरेको छ ।
उत्तराखण्ड राज्यअन्तर्गतको सीमावर्ती धार्चुला प्रशासनले जिल्ला प्रशासन कार्यालय दार्चुलालाई कालापानीदेखि लिम्पियाधुरासम्मको जमिन भारतको भएको दाबी गर्दै त्यहाँ नेपालीहरूको सम्भावित घुसपैठबारे सूचना दिन आग्रह गरेको छ । जिल्ला प्रशासन कार्यालयले भने मौखिक जवाफ पठाएर ती क्षेत्रमा नेपालबाट कोही पनि नगएको स्पष्ट पारेको छ ।
असार ३० गते धार्चुलाका उपजिल्ला अधिकारी अनिलकुमार शुक्लाले अवैध रूपमा सीमा पार गरेर भारत देशमा प्रवेश गरेकाहरूको सम्बन्धका विषयमा लेखेको चिठीमा कालापानीदेखि नेपालको नयाँ नक्सामा उल्लेखित सबै भूभाग दाबी गरिएको छ ।
उनले लेखेका छन्– विशेष सूत्रहरूबाट जानकारी प्राप्त भएको छ कि विभिन्न नेपाली समूहले भारतीय क्षेत्र गुन्जी, कालापानी, लिम्पियाधुरामा अवैध रूपमा लुकिछिपी पार गर्न चाहेको छ । जसबाट मिडियाको पनि ध्यानाकर्षण हुन सक्ने र दुवै देशका प्रशासनलाई अप्ठ्यारो पनि पर्न सक्नेछ । अतः अनुरोध छ कि यसप्रकारका कुनै सूचना तपाईंलाई प्राप्त भएमा सूचना तत्काल उपलब्ध गराउने कष्ट गरिदिनुहोला ।
दार्चुलाका सहायक प्रमुख जिल्ला अधिकारी टेकसिंह कुँवरले कालापानी लिम्पियाधुरातिर कोही पनि नेपाली नगएको बताए । उनले नयाँ पत्रिकासँग भने– नेपालतिर सडक बन्दै गरेको, हेलिकोप्टरले सामान ढुवानी गर्दै गरेको, घाँटी बगरमा सेनाको क्याम्प देखेर भारतीय प्रशासनले शंका गरेको हुन सक्छ । त्यतातिर नेपालीहरू कोही पनि गएका छैनन् ।
नेपालले कालापानीदेखि लिम्पियाधुरासम्मको भूभाग समेटेर गत ५ जेठमा नयाँ नक्सा जारी गरेको छ । भारतले भने नेपालको कृत्रिम भूभाग विस्तार अमान्य भएको बताउँदै आएको छ ।