जुम्ला कोरोना भाइरस संक्रमणमुक्त भएको छ ।
कर्णाली स्वास्थ्य विज्ञान प्रतिष्ठान शिक्षण अस्पतालको आइसोलेसनमा एकजना संक्रमित निको भएर घर फर्केपछि जुम्ला कोरोना भाइरस संक्रमणमुक्त भएको हो ।
कर्णाली स्वास्थ्य विज्ञान प्रतिष्ठान शिक्षण अस्पताल जुम्लाको आइसोलेसनमा बाँकी रहेका एकजनाको कोरोना रिपोर्ट नेगेटिभ आएपछि संक्रमितको संख्या जुम्लामा शून्य भएको प्रतिष्ठानका डा. धीरज गुरुङले बताए ।
प्रतिष्ठानका विशेषज्ञ डा. गुरुङले सुरुसुरुमा जिल्लामा कोरोनाको संक्रमण कम देखिए पनि बीचमा बढ्न पुग्यो र यसले निकै डरको अवस्था सिर्जना पनि गरेको बताए ।
जिल्लालाई संक्रमणमुक्त बनाउन सबैको अथक प्रयासबाट सम्भव भएको उनले बताए ।
उनले परीक्षणको दायरा बढाउँदा अझै संक्रमण भेटिन सक्ने भएकाले उच्च सतर्कता भने अझै कायम गरिरनुपर्ने अवस्था रहेको उनले बताए ।
प्रतिष्ठानका रजिष्ट्रार विश्वराज काफ्लेले कोभिडको त्रासको अवस्थामा स्वास्थ्यकर्मी र सरोकारवाला निकायहरूले गरेको सहयोग अतुलनीय रहेको बताए ।
संक्रमित शून्य भएपछि कोभिडविरुद्धको अभियानमा काम गर्ने सबै स्वास्थ्यकर्मीलाई सम्मान गरिएको छ ।
जिल्लामा सबै उपलब्ध नहुने भएकोले सांकेतिक रूपमा उपलब्ध स्वास्थ्यकर्मीलाई सम्मान गरिएको हो ।
जिल्ला प्रशासन कार्यालयले कर्णाली स्वास्थ्य विज्ञान प्रतिष्ठान शिक्षण अस्पतालको समन्वयमा कोरोनाविरुद्ध लड्ने प्रतिष्ठान र जनस्वास्थ्य सेवा कार्यालयका स्वास्थ्यकर्मीहरूलाई सम्मान गरिएको हो ।
सम्मान गर्दै प्रमुख जिल्ला अधिकारी भूपेन्द्र थापाले अहिले संकटको समयमा स्वास्थ्यकर्मी नागरिकका लागि वास्तविक नायक साबित भएको बताए ।