गोरखाका ११ स्थानीय तहको ३५ करोड ५१ लाख रकम बेरुजु देखिएको छ । महालेखापरीक्षकको कार्यालयले सार्वजनिक गरेको ५७औँ वार्षिक प्रतिवेदनमा यस्तो देखिएको हो ।
गत आर्थिक वर्षमा रकम बेरुजु देखिएको हो । सबैभन्दा धेरै बेरुजु रकम गोरखा नगरपालिका र सबैभन्दा कम धार्चे गाउँपालिकाको रहेको छ ।
कार्यालयको प्रतिवेदनअनुसार गोरखा नगरपालिकाको सात करोड ७२ लाख बेरुजु रहेकाे छ ।
धार्चे गाउँपालिकाको बेरुजु ७६ लाख रहेको प्रतिवेदनमा उल्लेख छ ।
पालुङटार नगरपालिकाको पाँच करोड ८३ लाख, सहिद लखन गाउँपालिकाको पाँच करोड ६३ लाख र गण्डकी गाउँपालिकाको चार करोड ९१ लाख बेरुजु रहेको कार्यालयले जनाएको छ ।
बारपाक सुलिकोट गाउँपालिकाको दुई करोड ६२ लाख, सिरानचोक गाउँपालिकाको दुई करोड १६ लाख र भीमसेन थापा गाउँपालिकाको एक करोड ८५ लाख बेरुजु रहेको छ ।
त्यसैगरी अजिरकोट गाउँपालिकाको बेरुजु एक करोड ५६ लाख, चुमनुव्री गाउँपालिकाको एक करोड चार लाख र आरुघाट गाउँपालिकाको एक करोड दुई लाख रहेको कार्यालयको वार्षिक प्रतिवेदनमा उल्लेख छ ।