कोरोना संक्रमण पुष्टि भएपछि घरकै आइसोलेसनमा बसेका बलिउड अभिनेत्री ऐश्वर्या राय र उनको छोरी आराध्या शुक्रबार राति अस्पताल भर्ना भएका छन् ।
यसअघि ऐश्वर्याका ससुरा अमिताभ बच्चन र श्रीमान अभिषेक काेराेना संक्रमित भएर अस्पतालमै उपचाररत छन् ।
उनीहरु दुबैलाई आठ दिनअघि अमिताभ र अभिषेक भर्ना भएकै मुम्बईको नानावटी अस्पतालमा लगिएको हो ।
संक्रमण भए पनि लक्षण नदेखिएकाले घरमै बसेका उनीहरुलाई सामान्य ज्वरो आएपछि अस्पताल लगिएको भारतीय संचारमाध्यमले जनाएका छन् ।
ऐश्वर्या र आराध्यालाई गएको आइतबार संक्रमित भएको पुष्टि भएको थियो ।
अमिताभको परिवारमा जया बच्चनको भने कोरोना परीक्षण नतिजा नेगेटिभ आएको छ ।
अमिताभ, अभिषेक, ऐश्वर्या र आराध्यासमेत घरका चार सदस्यमा कोरोना पोजेटिभ देखिएपछि जयाको दुई पटक परीक्षण गरिएको थियो ।
अमिताभ र अभिषेक बच्चनले कोरोना परीक्षण पोजेटिभ आएपछि ट्वीट गर्दै त्यसको जानकारी सार्वजनिक गरेका थिए ।