प्रदेश १ को आन्तरिक मामिला तथा कानुन मन्त्रालयले प्रहरीलाई एक सय ८० वटा मोटरसाइकल र स्कुटर प्रदान गरेको छ । शान्ति सुव्यवस्था कायम राख्न प्रहरीलाई सहज होस् भनेर मन्त्रालयले प्रदेश प्रहरी कार्यालयलाई एक सय ७० थान मोटरसाइकल र १० थान स्कुटर प्रदान गरेको हो ।
प्रदेश प्रहरी कार्यालयमातहतका प्रहरी कार्यालयलाई उपलब्ध गराउने गरी टिभिएस कम्पनीको एक सय ६० सिसीको अपाचे मोटरसाइकल ९० थान, बजाज कम्पनीको एक सय ५० सिसीको पल्सर मोटरसाइकल ८० थान र यामाहा कम्पनीको एक सय २५ सिसीको यामाहा स्कुटर १० थान प्रदान गरेको हो ।
यसैगरी ट्राफिक व्यवस्थापनमा सहजताका लागि मन्त्रालयले प्रदेश ट्राफिक प्रहरी कार्यालय इटहरीलाई समेत १० थान मोटरसाइकल हस्तान्तरण गरेको थियो । प्रदेश सरकारले हरेक वर्ष प्रहरीलाई सवारीसाधन प्रदान गर्दै आएको छ ।