पहिरोले बस्ती नै पुरिँदा बझाङको केदार स्युँ गाउँपालिका– ८ मल्लेसी गाउँका ६ जनाको मृत्यु भएको छ भने एकजना बेपत्ता भएका छन् । शुक्रबार राति अविरल वर्षासँगै आएको पहिरोले बस्ती नै पुरिएको हो । पहिरोमा पुरिएका ६ जनाको शव भेटिएको घटनास्थल पुगेका जिल्ला प्रहरी कार्यालयका डिएसपी गणेश बमले बताए । एकजना बेपत्ता रहेका छन् । उनको खोजी भइरहेको डिएसपी बमले बताए ।
पहिरोमा पुरिएर मल्लेसी गाउँकी ४२ वर्षीया राममतीदेवी जेठारा, उनका छोराछोरी ११ वर्षीय प्रयाग र सात वर्र्षीया अस्मिता जेठाराको मृत्यु भएको छ । त्यस्तै, उनीहरूका छिमेकी १६ वर्षीया शान्ति जेठारा, ८१ वर्षीय दले जेठारा र १५ वर्षीय सन्तु जेठाराको पनि शव भेटिएको डिएसपी बमले बताए । अझै मल्लेसी गाउँकै २२ वर्षीय गिरिजा जेठारा बेपत्ता रहेका छन् । स्थानीय बासिन्दा र सुरक्षाकर्मीले शनिबार दिनभरि खोज्दा पनि उनी भेटिएका छैनन् ।
मल्लेसी गाउँमाथिको रातापड सामुदायिक वन क्षेत्रबाट पहिरो खसेको हो । पहिरोले २० घर पुरिएका छन् । पहिरो खस्न थालेको थाहा पाएपछि स्थानीय बासिन्दा घर छोडेर सुरक्षित स्थानतर्फ भागेका थिए । ‘गाउँले भागेकाले धेरैको ज्यान जोगिएको रहेछ,’ डिएसपी बमले भने ।
आफूहरू सुरक्षित स्थानमा गए पनि गोठमा रहेका वस्तुभाउ भने लग्न नपाएको स्थानीय बासिन्दाले बताएका छन् । पहिरोमा परी २४ गाईगोरु, २२ भैँसी र ६५ बाख्रा पनि मरेको अवस्थामा भेटिएको प्रहरीले जनाएको छ ।
पहिरो गएको थाहा पाउनेबित्तिकै शनिबार बिहान सदरमुकाम चैनपुरबाट जिल्ला प्रहरी कार्यालयका डिएसपी बमको नेतृत्वमा प्रहरी टोली, सशस्त्र प्रहरीका डिएसपी गणेश शाहको नेतृत्वमा सशस्त्र प्रहरीको टोली र केदार स्युँ गाउँपालिकाकै बागथलास्थित कालंगा जलविद्युत् आयोजनाको सुरक्षार्थ खटिएको नेपाली सेनाको टोली मल्लेसी गाउँ पुगेको थियो ।