सिराहामा ८१ वर्षीया वृद्धासहित ६३ जना कोरोना जितेर घर फर्किएका छन् ।
चन्द्र माध्यमिक विद्यालयको आइसोलेसनमा बसेकी सिराहा नगरपालिका– १९ सन्हैठाकी ८१ वर्षीया कागतीदेवी मण्डल कोरोना जितेर घर फर्किएकी हुन् ।
घरका सदस्य कोरोना संक्रमित भएपछि मण्डललाई सिराहा क्याम्पसको क्वारेन्टाइनमा राखिएको थियो । दुई साता क्वारेन्टाइन बसाइकाे क्रममा गरिएकाे परीक्षणमा उनमा पनि कोरोना संक्रमण देखिएपछि चन्द्र माध्यमिक विद्यालयको आइसोलेसनमा राखिएको थियो ।
करिब २० दिनमा दुईपटक स्वाब संकलन गरी कोरोना परीक्षण गर्दा रिपाेर्ट निगेटिभ आएपछि मण्डललाई डिस्चार्ज गरिएको छ । उनीसँगै सिराहाको चन्द्र माध्यमिक विद्यालय र महेन्द्र गेनाई मेटरनिटी अस्पतालको आइसोलेसनबाट ६३ जना डिस्चार्ज भएका छन् । चन्द्र माध्यमिक आइसोलेसनबाट ४९ जना र महेन्द्र गेनाईबाट १४ जनालाई डिस्चार्ज गरिएको डा. सुभाष मण्डलले जानकारी दिए ।
डिस्चार्ज हुनेहरू लहान नगरपालिकाका तीन, धनगढीमाई नगरपालिकाका दुई, कर्जन्हा नगरपालिकाका एक र सिराहा नगरपालिका क्षेत्रका ५७ जना रहेका छन् ।
महेन्द्र गेनाईमा २५ र चन्द्र माध्यमिक विद्यालयको आइसोलेसनमा २४ जना गरी ४९ जना कोरोना संक्रमित अझै रहेको डा. मण्डलले बताए ।