शनिबार ११ बजेका लागि बोलाइएको सत्तारुढ दल नेकपाको स्थायी कमिटीकाे बैठक फेरि स्थगित भएको छ । पार्टीभित्र जारी विवाद समाधानका लागि गृहकार्य नपुगेको भन्दै शनिबारको बैठक २२ गतेसम्मका लागि स्थगित भएको हो ।
पार्टी एकताका लागि अन्तिम प्रयास गर्न बिहीबार स्थायी कमिटी बैठक स्थगित गरेर भएका प्रयास असफल भएपछि शनिबारका लागि बाेलाइएकाे बैठक पनि सरेकाे छ ।
शनिबार बिहान प्रधानमन्त्री तथा अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच टेलिफोन संवादपछि बैठक २२ गतेसम्मका लागि स्थगित भएको स्रोतले जानकारी दियो । स्रोतका अनुसार अहिले केहीबेरमा दुवै अध्यक्षबीच छलफल हुने कार्यक्रम छ ।
शुक्रबार बालुवाटारमा अध्यक्षद्वयबीच भएको तीन घन्टा लामो छलफल सकारात्मक नभएपछि थप गृहकार्य गरेर अन्तिम निष्कर्षमा पुग्ने सहमति भएको थियो ।
पार्टी विभाजनउन्मुख भएपछि नेकपाका शीर्ष नेता तथा दोस्रो पुस्ताका नेता पार्टी एकता जोगाउन दौडधुप गरिरहेका छन् ।