- वि.सं २०८१ बैशाख ७ शुक्रबार
कञ्चनपुरमा एक जोडीले आत्महत्या गर्ने उद्देश्यले नहरमा हामफालेका छन् ।
शुक्रबार बिहान ११ बजेतिर भीमदत्त नगरपालिका– १ भाँसीमा एक नवप्रेमी जोडीले यस्तो गरेका हुन् । भीमदत्त नगरपालिका– २ उल्टाखामका २३ वर्षीय राकेश चौधरी र महुलियाकी १९ वर्षीया रेनु चौधरीले नहरमा हामफालेका हुन् ।
स्थानीयले देखेपछि केहीछिनमै किशोरीको उद्धार गरिए पनि किशोरको भने उद्धार गर्न सकेनन् ।
सोही नगरबाट कामका लागि गाउँतिर गइरहेका सुनिल चौधरीले केटाकेटीले नहरमा हामफालेको थाहा पाएपछि केटीलाई नहरबाट निकालेको बताए ।
‘पानीमा केही मात्रै टाउको देखिएको थियाे,’ ‘उनले भने, ‘मैले सुरुमै उनलाई निकालेँ, पेटमा पानी भरिएर उनी बेहोस थिइन् ।’
१०–१५ मिनेटमा केटीको होस आएपछि उनले नै केटा पनि नहरमा छ भनेपछि खोज्दा केटा नभेटाएको उनले बताए ।
उनले भने, ‘केटीलाई महाकाली अस्पताल पठाइयो, वडाध्यक्ष र प्रहरीलाई खबर गरे, अनि सबै आए केटालाई खोज्दै छौँ ।’ हामफाल्नुको कारण यकिन नभएको उनले बताए ।
आपसमा झैझगडा वा आवेगमा लिएको निर्णय भएको पनि हुन सक्ने अनुमान गरिएको उनले बताए ।
केटीको महाकाली अस्पतालमा उपचार भइरहेको छ । भीमदत्त नगरपालिका– १ का वडाध्यक्ष आसेफ कुँवरले माथि पुलमा लामो समयदेखि बसेका केटाकेटीले एक्कासि सँगै हामफालेको स्थानीयले देखेको बताए ।
