आफ्नै आश्रमकी आनीलाई बलात्कार गरेको अभियोगमा लिटल बुद्धका नामले चिनिने रामबहादुर बमजन (रामलाल बमजन) विरुद्ध अदालतमा मुद्दा दायर भएको छ ।
जिल्ला सरकारी वकिल कार्यालय, सर्लाहीले बिहीबार जिल्ला अदालतमा जबर्जस्ती करणी मुद्दा दायर गरेको हो ।
पटकपटकको पक्राउ प्रयास असफल भएपछि फरार प्रतिवादी बनाएर मुद्दा दायर गरिएको छ ।
१४ वर्षसम्म कैद सजाय माग दाबीसहित मुद्दा दायर गरिएको सर्लाहीका जिल्ला न्यायाधिवक्ता केशवप्रसाद गौतमले बताए ।
१४ देखि १६ वर्ष उमेरको बालिकालाई बलात्कार गरेको कसुरमा १२ देखि १४ वर्षसम्म कैद सजाय हुने प्रावधान मुलुकी अपराध संहितामा रहेकोले त्यहीअनुसार मागदाबी लिएर मुद्दा दायर गरिएको उनले जानकारी दिए ।
बमजनका दुई सहयोगीलाई समेत मतियारका रूपमा मुद्दा दायर भएको छ ।
केन्द्रीय अनुसन्धान ब्युरो (सिआइबी) को सहयोगमा सर्लाही प्रहरीले बमजनमाथि अनुसन्धान गरेको थियो ।
२० साउन ०७३ मा उनले सर्लाहीको आश्रममा १६ वर्षीया आनीलाई बलात्कार गरेको प्रहरीले जनाएको छ ।
धम्क्याएर पटक–पटक बलात्कार गरेको पीडितको उजुरीको आधारमा प्रहरीले उनीमाथि अनुसन्धान गरेको थियो ।
उनका कर्तुत सार्वजनिक भएपछि घटनाको दुई वर्षपछि पीडितले जाहेरी दिएकी थिइन् ।
जाहेरीको आधारमा गत २३ फागुनमा जिल्ला अदालत सर्लाहीले बमजनविरुद्ध पक्राउ पुर्जी जारी गरेको थियो ।
त्यसयता प्रहरीले सिन्धुलीस्थित उनको आश्रममा तीनपटक छापा मारे पनि उनी भने पक्राउ परेनन् ।
मुद्दाको हद म्याद सकिन लागेकाले फरार बनाएर उनीविरुद्ध मुद्दा दायर भएको हो ।
तीनैपटक प्रहरीलाई छक्याए
प्रहरीले बमजनको सिन्धुलीस्थित आश्रममा तीनपटक छापा हानिसकेको छ ।
पछिल्लोपटक गत ४ असारमा सिआइबीको टोलीले सिन्धुलीको कमलामाई नगरपालिका– ८, पहिरेस्थित बोधी श्रवण धर्म संघ (बोधी मार्ग दर्शन मैत्री धर्म आश्रम) मा छापा हानेको थियो, तर प्रहरी अप्रेसन सफल भएन । अर्थात् आरोपी बमजन समातिएनन् ।
उनी आश्रमभित्र बंकर बनाएर लुकेको आशंकामा लाइफ डिटेक्टरसमेत प्रहरीले प्रयोग गरेको थियो । तर, पनि उनी त्यहाँ नभेटिएको सिआइबीले जनाएको छ ।
सामान्यतया नदीमा डुबेका तथा पहिरोमा परेका व्यक्ति खोज्न प्रहरीले यस्तो प्रविधि प्रयोग गर्छ ।
सशस्त्र प्रहरीसँग मात्र यस्तो प्रविधि छ । सशस्त्र प्रहरीबाटै सो प्रविधि लगेर प्रहरीले उनको आश्रममा छापा हानेको थियो ।
‘महिलाको भेषमा बसेको हुन सक्ने आशंकामा पनि महिला प्रहरीहरूले चेकजाँच गरे,’ सिआइबीका एक अधिकारी भन्छन्, ‘तर, उनी केही समययता आश्रमबाहिर रहेको नै प्रस्ट भयो ।’
त्यस्तै, लाइफ डिटेक्टर र रेस्कुमा खटाइएको दुई प्रकारका कुकुरसमेत लगेर प्रहरीले छापा हानेको थियो । तर, उनी आश्रममा नभेटिएको सिआइबीका प्रवक्ता एसपी बेलबहादुर पाण्डेले बताए ।
उनले अवैध रूपमा सञ्चारसेट प्रयोग गरेकामा सिन्धुली प्रहरीले तीनवटा सेट बरामद गरी कारबाही प्रक्रिया अघि बढाएको छ ।
बमजनलाई भगाउन सहयोग गर्ने ज्ञानकुमार बमजन र जेबी भन्ने जितबहादुर तामाङविरुद्ध मुद्दा दायर गरेको छ ।
उनीहरूलाई मतियारका रूपमा मुद्दा दायर गरिएको जिल्ला न्यायाधिवक्ता गौतमले जानकारी दिए ।
आश्रम भत्काउन वनलाई पत्राचार
सरकारी वनको जग्गा कब्जा गरेर आश्रम बनाएका बमजनको आश्रमभित्र कम्पाउन्डसहितको छुट्टै ‘दरबार’ छ ।
जहाँ आश्रमभित्रकै व्यक्तिलाई समेत प्रवेश निषेध छ । उनको निवास पाँचतारे होटेलको कोठाभन्दा सुविधासम्पन्न रहेको प्रहरीले जनाएको छ ।
त्यस्तै उनको डस्टर र ल्यान्डक्रुजर गाडी पनि छ । आश्रममा घोडासमेत पालिएको छ । सुविधासम्पन्न जिमखानासमेत छ ।
आश्रमको चारैतिर सेन्ट्री राखिएको छ । जहाँ सर्वसाधारणलाई प्रवेश निषेध गरिएको छ ।
आश्रमभित्र अवैध रूपमा बंकरसमेत बनाइएको छ । जंगल मासेर बसेकाले उनीविरुद्ध कारबाही गर्न प्रहरीले वन कार्यालयलाई पत्राचार गरेको छ ।
तर, दबाबको कारण वन र नगरपालिकाले उनलाई कारबाही गर्न सकेको छैन । उनको आश्रम जाने बाटो नगरपालिकाले नै बनाइदिएको थियो ।
उनको सिन्धुपाल्चोकको आश्रममा बस्ने तीन आनी बेपत्ता रहेको घटनाको पनि प्रहरीले अनुसन्धान गरिरहेको छ ।
तर, बेपत्ता व्यक्तिहरूको कुनै प्रमाण फेला नपर्दा प्रहरीमा जाहेरी दर्ता हुन सकेको छैन ।