रुकुम पश्चिमको चौरजहारी नगरपालिकामा पिसिआर परीक्षण सुरु भएको छ । नगरपालिकाले पिसिआर मेसिनसहित आवश्यक सामग्री खरिद गरेर प्रयोगशाला स्थापना गरेपछि चौरजहारीमा पिसिआर परीक्षण सुरु भएको हो ।
कर्णाली स्वास्थ्य विज्ञान प्रतिष्ठान जुम्लाबाट आएको बायोमेट्रिक इन्जिनियर, डाक्टर र कर्मचारीहरूको टोलीले पिसिआर मेसिनलगायतका सामग्री जडान गरेपछि बुधबार प्रयोगशालाको उद्घाटन गरिएको थियो ।
पहिलो दिन चारजनाको स्वाबको नमुना परीक्षण गरिएकामा चारैजनाको रिपोर्ट नेगेटिभ आएको चौरजहारी नगरपालिकाका निमित्त प्रमुख प्रशासकीय अधिकृत रामबहादुर केसीले जानकारी दिए । उनका अनुसार सफल परीक्षणसँगै प्रयोगशालाको उद्घाटन भएको र अब नियमित रूपमा पिसिआर विधिबाट स्वाब परीक्षण भइरहेको छ ।
कर्णाली स्वास्थ्य विज्ञान प्रतिष्ठान जुम्लाबाट आएको टोलीले नगरका स्वास्थ्यकर्मीहरूलाई प्रयोगशाला सञ्चालनका लागि तालिम दिइरहेको र तालिम पाएपछि नगरकै स्वास्थ्यकर्मीको टिमले प्रयोगशाला चलाउने निमित्त प्रमुख प्रशासकीय अधिकृत केसीको भनाइ छ ।