लगानीकर्ता हौसिएर सेयर बजार बढ्दा एकैदिन तीनपटक सर्किट ब्रेक
अपेक्षाविपरीत मंगलबार सेयर बजारमा उच्च वृद्धि हुन पुग्दा तीनपटक सर्किट ब्रेक लागेको छ । अघिल्लो दिन बजार ओरालो लाग्ने क्रममा सर्किट ब्रेक लागेपछि बजार सुधारिने क्रममा थियो ।
मंगलबार बजार खुलेदेखि नै बढ्ने क्रममा रह्यो । दिउँसो १ बजे नेप्से परिसूचक ६ प्रतिशतले बढेपछि पूरै दिनका लागि बजार बन्द भएको छ ।
सोमबारको कारोबार देखेर लगानीकर्ताहरू हौसिएका थिए । अपेक्षाअनुसार बजार नघट्ने सम्भावना देखिएको भन्दै लगानीकर्ताहरूले लगानी बढाएका हुन् ।
यद्यपि बजारको प्रवृत्ति यकिन गर्न केही दिनको कारोबार हेर्नुपर्ने विश्लेषकहरू सुझाउँछन् ।
‘अर्थतन्त्रमा समस्याहरू देखिइरहेकाले अहिले नै हतारमा निर्णय गर्नु ठीक होइन,’ एक विश्लेषकले भने, ‘बजार घट्छ नै भन्ने होइन, तर बढ्नसमेत ठोस कारणहरू चाहिने भएकाले संयमित हुनुपर्ने अवस्था भने छ ।’
तीन महिना बन्दपछि खुलेको बजारमा लगानीकर्ताहरू उत्साहित हुँदा बजारमा उच्च वृद्धि देखिएको हो ।
मंगलबार पूर्ण समय बजार खुल्न नपाएको कारण कारोबार रकममा समेत लगभग ५० प्रतिशतले कमी आएको छ ।
कुल २२ करोड ७२ लाख रुपैयाँको सेयर किनबेच भएको छ । एक सय १३ कम्पनीको मूल्य बढेर कारोबार भएको छ भने १३ कम्पनीको मूल्य घटेको छ ।
जीवनबिमा कम्पनीहरूको मूल्य १० प्रतिशतसम्म बढेको छ । कारोबारमा आएको होटेल र सामूहिक लगानी कोष समूहकाे भने घटेको छ ।