प्रमुख प्रतिपक्षी दल नेपाली कांग्रेसका सभापति शेरबहादुर देउवाले भूमि फिर्ता ल्याउने विषयमा राष्ट्रिय एकता प्रदर्शित भएको बताएका छन् ।
प्रतिनिधिसभाको आजको बैठकमा ‘नेपालको संविधान दोस्रो संशोधन विधेयक, २०७७’ माथिको छलफलमा पार्टी संसदीय दलका नेता देउवाले संविधान संशोधनमा सबै दलको समर्थन देखिनाले नेपालीबीचको राष्ट्रिय एकता झल्किएको बताए ।
उनले कालापानी, लिपुलेक, लिम्पियाधुरा नेपालकै भूमि भएकाले त्यो भूमि नेपालमा समेट्नु जायज र स्वfभाविक भएको बताए ।
उनले याे राष्ट्रिय एजेन्डाको विषय भएकाले सबै दलहरूले साथ दिएको बताए ।
सीमाका विषयमा काली नदी नै सीमारेखा स्पष्ट उल्लेख भएको भन्दै उनले आफ्नो भूमि समेट्नु नेपालको स्वाभाविक कार्य भएको बताए ।
सभापति देउवाले सुगौली सन्धि १८१६ अनुसार कालीनदी पूर्वको जमिन नेपालको हो भन्ने कुरा स्पष्ट रहेको तथा अंग्रेज र चीनले छापेको नक्सामा पनि काली नदीपूर्वको जमिन नेपालको भएको स्पष्ट गरे ।
उनले भने, ‘कालीनदीपूर्वको जमिन नेपालको हो भन्ने कुरा स्पष्ट छ । हाम्रो पार्टीको केन्द्रीय समिति बैठकले पनि सशोधन प्रस्तावका पक्षमा निर्णय गरेको छ । यो संशोधन प्रस्तावलाई हाम्रो केन्द्रीय समितिले पूर्ण रूपमा समर्थन गरेको छ भने संसदीय दलले पनि पूर्ण समर्थन गरेको छ । यसमा सबै पार्टीको समर्थन देखिनु, यो नेपालीहरूको राष्ट्रिय एकता र नेपालको हितमा देखिएको छ । नेपालीहरू जुनसुकै ठाउँमा भए पनि राष्ट्रिय हितका लागि, सार्वभौमसत्ताका लागि, अखण्डताका लागि एकजुट छन् भन्ने कुरा स्पष्ट भएको छ ।’