पास लिएका निजी सवारीसाधनलाई पनि शुक्रबारदेखि जोर–बिजोर प्रणाली लागू हुने भएको छ । महानगरीय ट्राफिक प्रहरी महाशाखाका अनुसार औषधि र खाद्यान्न बोक्नेबाहेक सबै सवारीसाधनलाई जोर–बिजोर प्रणाली लागू हुनेछ ।
लकडाउनको स्वरूप परिवर्तन गरी सरकारले शुक्रबारदेखि निजी सवारीसाधन जोर–बिजोरका आधारमा चलाउने दिने निर्णय गरेको हो । अत्यावश्यक कामले पास लिएर सवारी चलाउँदै आएकालाई पनि जोर–बिजोर प्रणाली लागू गर्दा समस्या हुने देखिन्छ । ‘अहिले हामीलाई सबैलाई लागू गर्ने कुरा आएको छ,’ ट्राफिक महाशाखाका प्रमुख एसएसपी भीम ढकालले भने, ‘पछि संशोधन हुन सक्छ ।’
शुक्रबारदेखि काठमाडौं उपत्यकाभित्र र अन्यत्र जिल्लाभित्र मात्र निजी सवारीसाधन जोर–बिजोर प्रणालीमा चलाउन पाइने महाशाखाले जनाएको छ । उपत्यकाको तीन जिल्ला काठमाडौं, ललितपुर र भक्तपुरलाई एक जिल्ला मानी यो व्यवस्था लागू गरिनेछ । एक जिल्लाबाट अर्को जिल्लामा भने जान पाइने छैन ।
यो नियमअन्तर्गत चारपांग्रे सवारीसाधनमा चालकसहित तीनजना मानिस मात्र र २ पांग्रे सवारीसाधन ( मोटरसाइकल, स्कुटर, मोपेड) मा भने चालक एकजना मात्र राखी सञ्चालन गर्न पाइने एसएसपी ढकालले बताए ।
जोर–बिजोर प्रणालीमा जोर गतेका दिन जोर नम्बर प्लेट भएको सवारीसाधन र बिजोर गतेका दिन बिजोर नम्बर प्लेट भएको सवारीसाधन सञ्चालन गर्नुपर्ने महाशाखाले जनाएको छ ।
अत्यावश्यक सवारीसाधनबाहेक निजी सवारीसाधनहरू बेलुका ९ बजेदेखि बिहान ५ बजेसम्म चलाउन भने रोक लगाइएको छ ।
कुनै पनि कालो प्लेटका सार्वजनिक भाडाका सवारीसाधन बस, माइक्रो, हाइस, ट्याक्सी, ट्याम्पो भने चलाउन पाइने छैन ।
अत्यावश्यक कामबाहेक जोर–बिजोर प्रणालीलाई उल्लंघन गरेर सवारीसाधन चलाउनेउपर भने विभिन्न चेकप्वाइन्टमा खटिएका ट्राफिक प्रहरीले चेकजाँच गरी नियमानुसार कारबाही गर्ने कुरा महाशाखाका प्रवक्ता एसपी जीवनकुमार श्रेष्ठले जानकारी दिए । उनले उपत्यका भित्रिने र बाहिरिने सवारीसाधनलाई भने अनिवार्य पास लिएको हुनुपर्ने बताए ।