लगातारको हिमपातका कारण मार्तडी–कोल्टी सडकखण्ड अवरुद्ध भएको छ । सडक अवरुद्ध हुँदा यात्रुबीच बाटोमै अलपत्र परेका छन् ।
हिमपातका कारण मानिसको दैनिकी कष्टकर बनेको छ । कामकाजका लागि सदरमुकाम मार्तडी आउने मानिसले सास्ती खेप्नुपरेको छ । ढम्कनेदेखि पाण्डुसैनसम्म बाक्लो हिमपात भएकाले हिँडेर आवतजावत गर्न सम्भव नभएको स्थानीय लक्ष्मीराज पाध्यले बताए ।
हिमपातले गर्दा ग्रामीण भेगका कच्ची सडक हिलाम्मे भएकाले यात्रा गर्न जोखिक भएको स्थानीय यातायात व्यवस्था समितिले जनाएको छ ।
सदरमुकाम मार्तडीबाट गौमुल र कोल्टीसम्मको सडकमा सबैभन्दा बाक्लो हिमपात भएकाले जिप सेवा बन्द भएको जिल्ला प्रहरी कार्यालयले जनाएको छ । हिमपातकै कारण जिल्ला सदरमुकाम मार्तडीबाट विभिन्न ठाउँमा सञ्चालन हुँदै आएको जिप सेवा पनि ५ दिनदेखि अवरुद्ध छ ।
ढम्कनेदेखि पोरखे लेकमा बाक्लो हिउँ परेकाले मार्तडीदेखि कोल्टीसम्मको कच्ची सडक खोल्न करिब एक साता लाग्ने प्रहरीले जनाएको छ ।