सोती घटनामा संलग्न भएकाे आराेपमा थप तीनजना पक्राउ
६ जना मारिएकाे रुकुम पश्चिमको चौरजहारी नगरपालिका– ८, सोतीमा भएको घटनामा संलग्न भएको आरोपमा थप तीनजना पक्राउ परेका छन् । पीडित परिवारले दिएको जाहेरीका आधारमा दुईजना र पक्राउ परेकाको बयानका आधारमा एकजनालाई प्रहरीले पक्राउ गरेको हो ।
पक्राउ पर्नेमा पीडित परिवारले किटानी जाहेरी दिएकामध्ये फरार सोती गाउँका १९ वर्षीय घमण्ड मल्ल र सोही ठाउँका १९ वर्षकै विष्णु मल्ल रहेको जिल्ला प्रहरी प्रमुख प्रहरी नायव उपरीक्षक ठगबहादुर केसीले जानकारी दिए ।
उनका अनुसार पक्राउ परेकाहरूको बयानका आधारमा सोती गाउँका २६ वर्षीय सर्वजित भनिने सविन पुनलाई पनि पक्राउ गरिएको छ । जेठ १० गते ६ युवाको ज्यान जाने गरी भएको सोती घटनामा पक्राउ पर्नेको संख्या २८ पुगेको छ । मृतकका परिवारले दिएको जाहेरीका आधारमा २० जना र पक्राउ परेकाहरूको बयानका आधारमा आठजनालाई पटकपटक गरी पक्राउ गरेको उनले बताए । बुधबार पक्राउ परेकालाई पनि जिल्ला अदालतबाट म्याद थप गरी अनुसन्धान गर्ने प्रहरीले जनाएको छ ।
यसैबीच प्रहरीले घटनाको अनुसन्धान अन्तिम चरणमा पुगेको जनाएको छ । ‘हामी घटना अनुसन्धानको अन्तिम चरणमा पुगेका छौँ,’ डिएसपी केसीले भने ।
आफ्नी १७ वर्षीया प्रेमिकालाई भगाएर बिहे गर्न भनी आएका भनिएका जाजरकोटको भेरी नगरपालिका– ४, रानागाउँका नवराज विकको समूहलाई सोती गाउँका स्थानीयले आक्रमण गरेका थिए ।