ठमेलस्थित मनाङ होटेलले विदेशबाट आउने नेपाली नागरिकका लागि होल्डिङ सेन्टरको रूपमा तयार पारेकाे छ । सरकारले विदेशबाट उद्धार गरेर ल्याउने नेपाली नागरिकलाई होटेलमा राख्ने नीति लिएपछि व्यवसायीहरूले होटेललाई हाेल्डिङ सेन्टरका रूपमा प्रयोग गर्न तयार भएका हुन् ।
मनाङ होटेलले ५० बेड उपलब्ध गराउने तयारी गरेको छ । होटेलका व्यवस्थापक रमेश गिरीका अनुसार प्रयोग गरिने सबै कोठा जर्मन प्रविधिबाट डिसइन्फेक्सन गरिएको छ । ‘हामी हरेक दिन कोठाहरूमा डिसइन्फेक्सन स्प्रे गर्छौँ,’ उनले भने ।
यसबाहेक होलका कर्मचारीलाई सम्भावित संक्रमणबाट जोगाउन पनि होटेलले तयारी गरेको छ । कर्मचारीलाई मास्क, पञ्जा उपलब्ध गराउनेसँगै कर्मचारीको बिमासमेत गरिएको होटेलले बताएको छ । होटेलले विदेशबाट आउने नेपाली नागरिकलाई सरकार र होटेल एसाेसिएसन नेपालले तोकेअनुसारको शुल्क लिने बताएको छ ।