- वि.सं २०८१ बैशाख ७ शुक्रबार
अन्तर्राष्ट्रिय क्रिकेट काउन्सिल (आइसिसी)ले सार्वजनिक गरेको गाइडलाइन्समा केही समस्या देखिएको छ ।
गाइडलाइन्सअनुसार तीव्र गति र स्पिनबलरले धेरै समस्या सामना गर्नुपर्ने देखिन्छ । आइसिसीको गाइडलाइन्समा भनिएको छ, ‘फिल्डमा रहने फिल्डरले मास्क लगाउनुपर्छ ।’ आइसिसीले यो सबै खेलाडीको सुरक्षाका लागि नै नियम बनाएको जनाएको छ । यो नियम सबैमा लागू हुन्छ ।
बलरले मास्क लगाएर बलिङ गर्दा ध्यान केन्द्रित गर्न नसकिने विश्लेषकहरूले दाबी गरेका छन् । बलरले बलको एक भाग चम्किलो बनाउन थुक राख्न नपाउने भनिएको छ । मास्क लगाउनुपर्ने र थुकसमेत राख्न नपाउँदा बलरले आफ्नो स्वाभाविक लयमा बलिङ गर्न नसक्ने विश्लेषकहरूको भनाइ छ ।
पाकिस्तानका पूर्वकप्तान तथा वर्तमान प्रशिक्षक मिस्वाह उलहकले आइसिसीको गाइडलाइन्सले बलरहरू इन्फेक्सन हुनबाट जोगिने धारणा राख्छन् । यसकारण मिस्वाह यो नियम अति नै उत्तम भएको बताउँछन् । ‘बलरले मास्क लगाएर बलिङ गर्दा इन्फेक्सन हुनबाट जोगिन्छ,’ मिस्वाहले भने ।
भारतका पूर्वफास्टबलर अजित अग्राकरले बलरले मात्र बल नचम्काउने दाबी गर्छन् । उनी भन्छन्, ‘एकजना बलरले मात्र कहाँ थुक लगाएर बल चम्काउँछन्, फिल्डमा रहने सबै फिल्डरले यस्तो काम गरिरहेका हुन्छन् ।’ पिचको १५ यार्ड घेराभित्र रहेका फिल्डरले बललाई चम्काएर बलरलाई दिने गरेको उनले बताए ।
‘त्यो क्षेत्रमा फिल्डिङ गर्ने फिल्डरको बानी नै हो, थुक राखेर बल चम्काउने र अर्को फिल्डरलाई बल दिने,’ अग्राकरले भने, ‘क्रिकेटमा यो सामान्य कुरा हो ।’
अहिले आइसिसीको नयाँ नियमअनुसार सबै खेलाडीले त्यसको पालना गर्नुपर्ने उनको सुझाब छ । अग्राकर भन्छन्, ‘हामी पुरानो नियममै बाँधिएका छौँ, आइसिसीको नयाँ नियम पालना गर्न समय लाग्न सक्छ, तर मास्क लगाएर बलिङ गर्दा केही अप्ठ्यारो आउन सक्छ ।’
फास्टबलरले मास्क लगाएर तीव्र गतिमा बल फ्याँक्नु फाइदा र बेफाइदा भएको उनले बताए । उनी भन्छन्, ‘मास्क लगाएर बलिङ गर्नुगर्दा इन्फेक्सन हुनबाट जोगिन्छ, साथै तीव्र गतिमा बलिङ गर्दा फोक्सोमा समस्या आउन सक्नेछ ।’
