रुकुम पश्चिमको चौरजहारी नगरपालिकाको सोतीमा शनिबार भएको घटनामा बेपत्ता भएकामध्ये थप एकजनाको शव बिहीबार भेरी नदीमा फेला परेको छ ।
शनिबार भएको घटनापछि हराइरहेका भेरी नगरपालिकाका– ४ का १९ वर्षीय सन्दीप विकको शव कालाभुरनजिक फेला परेको हो ।
योसमेत घटनामा परी बेपत्ता भएका ६ जनामध्ये पाँचजनाको शव फेला परेको सशस्त्र प्रहरी बल जाजरकोटका प्रमुख डिएसपी योग्य बस्नेतले जानकारी दिए ।
घटनापछि हराएका भेरी नगरपालिका– ११ का गोविन्द शाही अझै फेला परेका छैनन् । भेरी नगरपालिका– ४ का नवराज विक, लोकेन्द्र सुनार, गणेश बुढा, चौरजहारीका टीकाराम सुनारको शव यसअघि नै फेला परिसकेको छ ।
हिउँ पग्लिएर भेरी नदी धमिलो भएकोले खोज्न कठिन भएको गोताखोरले बताएका छन् । अन्तर्जातीय प्रेमका कारण गत शनिबार पश्चिम रुकुमको चौरजहारी– ८ सोतीमा भएको घटनामा हराइरहेका तीनजनाको खोजी गर्न सशस्त्र प्रहरी बलको गोताखोर टोली परिचालन गरिएको थियो ।
घटना भएको ५ दिनसम्म पनि हराएकाहरू सम्पर्कमा नआएको र कतै नभेटिएपछि भेरी नदीमै डुबेका आशंकामा सशस्त्र प्रहरी गण शमशेरगन्जबाट तालिम प्राप्त गोताखोर झिकाएर परिचालन गरिएको थियो । तर, नदी धमिलो भएकाले पानीभित्र हेर्न नसकिएका र शंकास्पद स्थानमा छामेर खोज्नुपरेको बस्नेतले जानकारी दिए ।
हिउँ पग्लिएर पानीको बहाव बढेको र पानी धमिलो भएकाले खोजी कार्यमा कठिनाइ भएको उनले बताए ।