निर्माण पूरा नहुँदै कोरोना विशेष अस्पतालमा बिरामी भर्ना
जलेश्वरस्थित निर्माणाधीन कोरोना विशेष अस्पतालमा बिरामी भर्ना गरिएको छ । अस्पतालको भौतिक संरचना निर्माण अन्तिम चरणमा रहे पनि महोत्तरीमै दुईजनामा कोरोना पोजेटिभ देखिएपछि निर्माणाधीन अस्पतालमा राखेर उपचार सुरु गरिएको हो ।
यस अस्पतालमा तीनजना कोरोना पोजेटिभ र अन्य तीनजना आरडिटीमा पोजिटिभ देखिएकालाई आइसोलेसनमा राखेर उपचार भइरहेको छ । जलेश्वर अस्पतालका अध्यक्ष सुरेश पाण्डेयले कुल ६ जनालाई आइसोलेसनमा राखेको बताए । उनीहरू सबैको अवस्था सामान्य रहेको उनको भनाइ छ । अस्पतालमा रहेका बिरामीमध्ये एकजना धनुषाका हुन् ।
दुईवटा भवन रहेको जलेश्वर अस्पतालले कोरोना उपचारका लागि नयाँ भवन तयार पारेको छ । पुरानो भवन मर्मत गरी त्यसमा अस्पतालले नियमित सेवा प्रवाह गर्दै आएको छ ।
जलेश्वर अस्पतालले ५० बेडको आइसोलेसन तयार गरिसकेको छ भने आइसियू कक्ष पनि तयारी गरिरहेको छ । आइसियूमा आवश्यक भेन्टिलेटर ल्याउने प्रयास भइरहेको अध्यक्ष पाण्डेयले बताए ।