कर्णालीमा कोरोना संक्रमितको संख्या चार पुग्यो
कर्णाली प्रदेशमा कोरोना संक्रमितको संख्या चार पुगेको छ । कर्णाली प्रदेश अस्पतालको प्रयोगशालामा परीक्षण गरिएको थप तीनजनामा कोरोना संक्रमण पुष्टि भएको हो ।
गत सोमबार दैलेखका एकजनामा कोरोना पुष्टि भएको थियो । शनिबार कोरोना पुष्टि भएका थप तीनजना सुर्खेतका रहेका छन् । सुर्खेतमा फेला परेका कोरोना संक्रमित दुईजना बराहताल गाउँपालिका र एकजना चौकुने गाउँपालिकाको रहेको र उनीहरू सबै भारतबाट आएको बताइएको छ ।
बिहीबार भारतबाट आएका १५ नेपालीमा आरडिटी रिपोर्ट पोजेटिभ देखिएकोमा प्रादेशिक प्रयोगशाला सुर्खेतमा गरिएको पिसिआर परीक्षणमा तीनजनाको रिपोर्ट पोजेटिभ आएको हो । ‘आरडिटी गर्दा पोजेटिभ देखिएकामध्ये तीनजनाको पिसिआर रिपोर्ट पोजेटिभ आएको छ,’ प्रदेश अस्पताल सुर्खेतका निर्देशक डम्बर खड्काले भने, ‘पिसिआरमा पोजेटिभ देखिएका तीनजनालाई आइसोलेसनमा राखेर उपचार भइरहेको छ ।’
बिहीबार भारतबाट फर्किएका १६ सय नागरिकमध्ये बबईमा सात सय ४० जनाको आरडिटी परीक्षण गरिएको थियो । अहिले चारैजनाको उपचार प्रदेश अस्पताल सुर्खेतमा भइरहेको र उनीहरूको स्वास्थ्य अवस्था सामान्य रहेको निर्देशक खड्काले जानकारी दिए ।