सल्यानको दार्मा गाउँपालिकाका सहकारीहरूले सहकारीको बचत कार्ड र सामाजिक सुरक्षा भत्ता कार्डको धितोका आधारमा सहुलियत दरमा घरघरमै खाद्यान्न उपलब्ध गराएका छन् । 

गाउँपालिकाका चारवटा सहकारीमार्फत ६ वटा वडामा खाद्यान्न उपलब्ध गराइएको गाउँपालिका अध्यक्ष निमबहादुर केसीले जानकारी दिए । उनका अनुसार गाउँपालिकाका एक हजार नौ सय २७ घरधुरीमा सात सय ३२ क्विन्टल खाद्यान्न उपलब्ध गराइएको छ ।

लकडाउनका कारण नगदको समस्या हुने देखिएपछि सहकारीमा गएर भत्ता कार्ड र सहकारीको सदस्यले बचत धितो राखेर खाद्यान्न लिन सक्ने व्यवस्था गरिएको छ । गाउँपालिकाले सहकारीलाई खरिद मूल्यमा तीन प्रतिशत मात्रै नाफा लिएर उपभोक्ताको घरघरमै खाद्यान्न पुर्‍याउने सहमतिमा खरिद–बिक्रीको अनुमति दिइएको जनाएको छ ।

हरेक टोलमा गठन गरिएका खोजी तथा निगरानी समूहले मागेको तथ्यांक लिने र त्यसैको आधारमा सहकारीले खाद्यान्न पुर्‍याउने व्यवस्था गरिएको भल्चौर साना किसान कृषि सहकारी संस्थाका अध्यक्ष हरिकला मल्लले बताइन् । अहिले सहकारीमा १६ टन चामललगायतका खाद्य सामग्री मौज्दात रहेको उनले जानकारी दिइन् ।