नेपाल विद्यार्थी संघ लमजुङले राँके जुलुस निकालेको छ । भारतले नेपालको कालापानी क्षेत्र अतिक्रमण गरेर सडक खनेको विरोधमा राँके जुलुस निकालेकाे हाे । नेविसंघले सदरमुकाम बेंसीसहरमा बुधबार साँझ अतिक्रमणविरुद्ध विरोध प्रदर्शन गरेको हो ।
भीमसेनथानबाट सुरु भएकाे राँके जुलुस शेरा पुगेर कोणसभामा परिणत भएको थियो । कोणसभामा बोल्दै नेविसंघ लमजुङका उपसभापति दीपक अधिकारीले अतिक्रमित नेपाली भूमि फिर्ता गर्न सरकारले कूटनीतिक पहल नगरेको र आफ्नो भूमि मिचिँदासमेत सरकार उदासीन बनेको आरोप लगाए । उनले भने, 'सरकारले छिटोभन्दा छिटो कूटनीतिक पहल गरी अतिक्रमित भूमि फिर्ता गर्नुपर्छ ।'
पुत्ला दहन
सरकारको उदासीनता र भारतीय हस्तक्षेपविरुद्ध बुधबार साँझ नै नेविसंघले भारतका प्रधानमन्त्री नरेन्द्र मोदी र प्रधानमन्त्री केपी शर्मा ओलीको पुत्ला दहन गरेको छ ।
भारतले एकतर्फी रूपमा सडक सञ्जाल निर्माण गर्दासमेत सरकार उदासीन देखिएकाले प्रधानमन्त्रीको पुत्ला दहन गरिएको नेविसंघ लमजुङका उपसभापति अधिकारीले बताए ।