कोरोना रोकथाम तथा नियन्त्रणका लागि गरिएको लकडाउनका कारण ठप्प रहेको विकास निर्माण कार्यलाई जनकपुरधाम उपमहानगरपालिकाले सुचारु गर्न थालेको छ ।
विश्वभर फैलिएको कोरोना संक्रमण रोकथाम तथा नियन्त्रणका लागि गरिएको लकडाउनका कारण विकास निर्माण ठप्प रहेको भन्दै विकास निर्माणका केही काम अगाडि बढाउन मेयर लालकिशोर साहले निर्देशन दिएका थिए । कोरोना जोखिमलाई मध्यनजर गरेर स्वास्थ्य सुरक्षालाई ध्यानमा राख्दै सामाजिक दुरी कायम गरी विकास निर्माणको कार्यलाई अगाडि बढाउने निर्णय गरिएको मेयर साहले बताए ।
जनकपुर उपमहानगरपालिका वडा नं. ५ र ६ को पेठिया बजारदेखि रहिमपथ टोलसम्म सञ्चालनमा रहेको सहरी विकास आयोजनाअन्तर्गत सडक तथा नाला निर्माण कार्य सुरु भएको छ । काम पहिलेदेखि नै सुरु भएको भए पनि लकडाउनका कारण अवरुद्ध भएको थियो ।
आइतबार बिहान अनुगमन गर्दै मेयर साहले महावीर चोकदेखि पेठिया जाने सडक यथाशीघ्र कालोपत्रे गर्न निर्देशनसमेत दिएका छन् । यसका अलावा अन्य वडाका कार्यक्रमहरूसमेत चाँडै सुरु गरिने मेयर साहले बताए । कोरोना लामो समय रहने भन्दै उनले सबै क्षेत्र बन्द गर्दा मुलुक अप्ठ्यारो अवस्थामा जाने भएकाले विकास निर्माणका क्षेत्र विस्तारै खुला गर्नुपर्ने बताए ।