भारतले नेपाली भूमि अतिक्रमण गरी एकतर्फी सडक बनाएको विषयमा भारतीय राजदूतलाई परराष्ट्र मन्त्रालयमा बोलाएर बयान लिन राप्रपाले सरकारलाई सुझाब दिएको छ । राप्रपाले नेपाली भूमिको अतिक्रमण, सेनाको उपस्थिति र सडक निर्माण कार्यको विरोध गर्दै तत्काल कूटनीतिक वार्ताको माध्यमबाट समस्याको समाधान खोज्न आग्रह गर्दै भारत सरकारलाई पत्राचार गर्नसमेत सरकारको ध्यानाकर्षण गराएको छ ।
अतिक्रमणको विषयमा राष्ट्रिय सहमतिको आधारमा भावी रणनीति तयार गर्न सर्वदलीय बैठक अविलम्ब बोलाउन, अन्तर्राष्ट्रिय क्षेत्रको समेत ध्यानाकर्षण गर्न आवश्यक पहल गर्न र त्रिदेशीय बिन्दु सम्बन्धमा निर्णय गर्दा नेपालसँग परामर्श र सहमति नगरेकोप्रति खेद प्रकट गर्दै त्यसबारे चिनियाँ सरकारको ध्यानाकर्षण गराउनसमेत राप्रपाले सुझाब दिएको छ ।
राप्रपाका अध्यक्षत्रय पशुपतिशमशेर जबरा, डा. प्रकाशचन्द्र लोहनी र कमल थापाले आइतबार संयुक्त विज्ञप्ति जारी गर्दै भारत सरकारको मिचाहा प्रवृत्तिको भर्त्सना गरेका छन् । नेपाल सरकारको निष्क्रियता र उदासीनता खेदजनक रहेको विज्ञप्तिमा उल्लेख छ ।