तेह्रथुममा एक युवकले गरे आमाबाबुको हत्या
तेह्रथुममा आफ्नै छोराले आमाबाबुको हत्या गरेका छन् ।बिहीबार साँझ साढे ६ बजे तेह्रथुमको फेदाप गाउँपालिका– ५ इसिबुका २० वर्षीय कञ्चन लिम्बूले आफ्नै बुबा ४२ वर्षीय रूपबहादुर लिम्बू र सौतेनी आमा ३५ वर्षीया रुपेनी लिम्बूलाई बन्चरोले टाउको तथा ढाडमा प्रहार गरी हत्या गरेका हुन्।
बाबुआमाको हत्या गरी फरार भएका उनलाई पक्राउ गरेर अनुसन्धान भइरहेको जिल्ला प्रहरी कार्यालय तेह्रथुमले जनाएको छ ।
सालाद्वारा भिनाजुको हत्या
यसैगरी खोटाङको केपिलासगढी गाउँपालिका– २ का ४७ वर्षीय प्रीतिलाल राईलाई बिहीबार साँझ आफ्नै साला २७ वर्षीय मिलन राईले टाउकोमा ढुंगा प्रहार गरी हत्या गरेका छन् ।
साँझ ७ बजे घर फर्कँदै गर्दा साला मिलनले एक्कासि ढुंगाले टाउकोमा प्रहार गरेर भिनाजुको हत्या गरेका थिए । प्रहरीले हत्या आरोपमा सालो मिलन र उनका भाइ २० वर्षीय जीवनलाई पनि पक्राउ गरेको जनाएको छ ।