हिउँले अवरुद्ध जुफाल विमानस्थल खुल्यो
हिमपातका कारण अवरुद्ध डोल्पाको जुफाल विमानस्थल तीन दिनपछि खुलेको छ । लगातारको हिमपात र वर्षातले अवरुद्ध विमानस्थल घाम लागेर हिउँ पग्लेसँगै शुक्रबारदेखि खुलेको हो ।
विमानस्थल खुलेसँगै नेपालगञ्ज विमानस्थलदेखि तारा र समिट एयरलाइन्सले तीन वटा उडान गरेको छ । हिमपातले अवरुद्ध भएको विमानस्थल नखुलेकाले नेपालगञ्ज र सुर्खेतदेखि कुनै पनि हवाई उडान नभएपछि यात्रुलाई सास्ती भएको थियो ।
हवाई मैदानमा जमेको बाग्लो हिउँ बिहीबार साँझ पग्लेसँगै अवरुद्ध भएको हवाई सेवा शुक्रबारबाट सुरु भएको नागरिक उड्डयन प्राधिकरण जुफालका प्रमुख बालकुमार सिंहले जानकारी दिए । हवाई उडान भएपछि जिल्ला बाहिर आवत जावत गर्ने सर्वसाधारणलाई सहज हुनुका साथै दैनिक उपभोग्य सामाग्री ढुवानी सुरु भएको छ ।