बाँकेकाे नेपालगन्जमा थप सातजना कोरोना संक्रमित भेटिएका छन् । याेसँगै नेपालमा कोरोना संक्रमितको संख्या ८२ पुगेको छ । नयाँ सातैजना संक्रमित नेपालगन्ज उपमहानगरपालिका– ८ निवासी भएको स्वास्थ्य तथा जनसंख्या मन्त्रालयले जनाएको छ ।
मन्त्रालयका सहप्रवक्ता डा. समीरकुमार अधिकारीका अनुसार चारजना महिला र तीनजना पुरुषमा संक्रमणकाे पुष्टि भएको छ । मंगलबार भेरी अस्पताल नेपालगन्जमा गरिएको परीक्षणमा ९, ३२, ३४ र ५५ वर्षका महिला तथा २२, ३० र ४० वर्षका पुरुषमा कोरोना पुष्टि भएको मन्त्रालयले जनाएको छ । उनीहरू सबैको स्वास्थ्य सामान्य छ ।
यसअघि बाँकेमा एकैदिन १५ जना संक्रमित फेला परेका थिए । संक्रमितको संख्या बढेपछि नेपालगन्जमा २५ गतेसम्मलाई निषेधित क्षेत्र घोषणा गरिएको छ ।