कर्णाली प्रदेशमा प्रवेश हुने सबै सीमानाका बन्द गर्ने कर्णाली प्रदेश विपत् व्यवस्थापन परिषद्को बैठकले निर्णय गरेको छ । सोमबार बसेको बैठकले सात दिनसम्म प्रदेश प्रवेश हुने सबै सीमानाका बन्द गर्ने निर्णय गरेको हो ।
कर्णाली प्रदेशमा अहिलेसम्म कोरोना संक्रमण नदेखिएको र अन्य प्रदेशमा कोरोना संक्रमण बढ्दै गएका कारण सीमानाका सात दिनसम्म बन्द गर्ने निर्णय गरेको हो । कर्णाली प्रदेशमा प्रवेश हुने सबै सीमानाका बन्द गरिएको कर्णालीमा दैनिक उपभोग्य वस्तुसमेत सात दिनसम्म आयातमा रोक लगाइएको कर्णाली प्रदेशका प्रमुख सचिव टेकनारायण पाण्डेले जानकारी दिए ।
कर्णाली प्रदेश विपत् व्यवस्थापन परिषद् बैठकले प्रदेशका २५ स्थानमा थप विशेषज्ञ चिकित्सकसहितको स्वास्थ्यकर्मी टिम खटाउने निर्णयसमेत गरेको छ । कर्णाली जोड्ने सुदूरपश्चिम प्रदेश, प्रदेश नं. ५ र चिनियाँ नाका पूर्ण रूपमा सिल गर्ने निर्णय गरेको छ ।