नागरिकलाई सुरक्षित राख्न अमेरिकामा आप्रवासनमा अस्थायी प्रतिबन्ध लगाइने
अमेरिकी राष्ट्रपति डोनाल्ड ट्रम्पले सोमबार कोरोना भाइरसका कारण अमेरिकामा प्रवेश गर्न चाहनेका लागि दिँदै आएको ‘आप्रवासन भिसा’ अस्थायी रूपमा स्थगित गर्ने बताएका छन् ।
अदृश्य शत्रुको आक्रमणबाट अमेरिकी नागरिकलाई बचाउनुपर्ने र उनीहरूको रोजगारी जोगाउनुपर्ने परिस्थिति उत्पन्न भएका कारण अमेरिकामा अध्यागमनलाई अस्थायी रूपमा निलम्बन गर्ने कार्यकारी आदेश जारी गर्ने ट्रम्पले बताए ।
अमेरिकामा भाइरसको प्रकोप फैलिएपछि पछिल्लो चार सातामा दुई करोडभन्दा बढी अमेरिकीहरू बेरोजगार भएको तथ्यांक सार्वजनिक भएको छ ।
ट्रम्पले कार्यकारी आदेशबाट कुन अध्यागमन कार्यक्रममा के असर पर्न सक्छ भन्नेबारे कुनै विवरण भने प्रस्तुत गरेका छैनन् । ह्वाइटहाउसले पनि राष्ट्रपतिको ट्विटमा गरिएको घोषणाबारे विस्तृतमा जानकारी दिन अस्वीकार गरेको छ ।
गत महिना अमेरिकाले महामारीको कारण आप्रवासीहरू सहितका लागि प्रवेशाज्ञा दिन स्थगन गरिएको जनाएको थियो।
ट्रम्पले कोरोना भाइरसबाट प्रभावित चीन र युरोपेली मुलुकबाट अमेरिकामा हुने यात्रा प्रतिबन्धले यसको फैलावटमा सुस्तता आएको दाबीसमेत गरेका छन् । चीनबाट भने रोजगार भिसावाहक, विद्यार्थी र व्यवसायीहरूलाई अमेरिका यात्रा गर्न छुट दिने बताइएको छ ।
यता, क्यानडा र मेक्सिकोमा अत्यावश्यकबाहेक अन्य आवातजावतमा लगाइएका प्रतिबन्धमा थप अवधि कायम गर्ने भएको छ ।
अमेरिकामा हालसम्म भाइरसबाट सात लाख ५० हजारभन्दा बढी मानिस संक्रमित भएका छन् भने ४२ हजारको मृत्यु भइसकेको छ ।