असिनापानीले कालिकोटमा गहुँसहित हिउँदे बाली नष्ट
शनिबार बिहान परेको हावाहुरीसहितको असिनापानीले कालिकोटको नरहरिनाथ गाउँपालिकामा गहुँबालीसहित लगाइएको बाली नष्ट गरेको छ ।
हावाहुरीसँगै आएको असिनापानीले तरकारी, फलफूल तथा हिउँदे गहुँबालीमा ठूलो क्षति पुगेको स्थानीयले जनाएका छन् ।
हावाहुरी र असिनापानीले पाक्न लागेको गहुँ नष्ट गरेको नरहरिनाथ गाउँपालिका–९ लालुका चिन्तन नेपालीले बताए ।
‘बिहान एक्कासि हावाहुरीसहित असिनापानी पऱ्याे,’ उनले भने, ‘गहुँबाली पूर्ण रूपमा नष्ट बनाएको छ ।’
हावाहुरी र असिना पानीले भित्र्याउने वेला भएको गहुँबाली, तरकारीलगायतका दलहन बालीमा समेत क्षति पुगेको नरहरिनाथ गाउँपालिका– ९ लालुका प्रदीप बोहराले बताए ।
किसानले पाकेर ठिक्क परेको गहुँ भित्र्याउने क्रममा रहेको र यही वेला गहुँ असिनाले नोक्सान पार्दा उनीहरू ठूलो मर्कामा परेको स्थानीय सामाजिक कार्यकर्ता वीरेन्द्र बुढाले बताए ।