प्रमुख प्रतिपक्षी दल कांग्रेसले कोरोना संक्रमण (कोभिड– १९)को परीक्षण बढाउन सरकारसँग माग गरेको छ ।

कोरोना भाइरस संक्रमितको संख्या नौ पुगेसँगै कोरोना परीक्षण बढाउन कांग्रेसले माग गरेको हो । शनिबार मात्रै तीनजना संक्रमित थपिएका छन् ।

पार्टी प्रवक्ता विश्वप्रकाश शर्माले शनिबार विज्ञप्ति जारी गरी यसअघि संक्रमित देखिएका सबैको परिवारजन, छिमेकी र घुलमिल भएका साथी समूहको तत्काल परीक्षण गर्न माग गरे ।

कांग्रेसले देशबाहिरबाट आएका नेपालीलाई अनिवार्य रूपमा क्वारेन्टाइनमा बस्न कडाइ गर्न पनि माग गरेको छ । कोरोनाप्रति हेलचेक्र्याइँ गर्नु भनेको समुदायमा संक्रमण फैलने छुट दिनु भएको भन्दै शर्माले गम्भीरता देखाउन सरकारसँग आग्रह गरेका छन् ।