लकडाउनमा घरघरमा तरकारी
कोरोना भाइरसको संक्रमण फैलन नदिन सरकारले मुलुकभर लकडाउनको घोषणा गरेपछि कृषि उत्पादनले बजार नपाउने तथा उपभोक्ताले खान नपाउने स्थिति सिर्जना हुन थालेपछि भक्तपुरका युवाले उपभोक्ताको घरघरमा तरकारी पुऱ्याउन थालेका छन् ।
भक्तपुरका अगुवा कृषकहरू यतिवेला किसानको बारीमा गएर तरकारी संकलन गर्ने र उपभोक्ताको घरघरमा पुऱ्याउने काममा व्यस्त बनेका हुन् । उनीहरूलाई प्रत्येक दिन बिहान किसानको खेतमा गई तरकारी संकलन गर्ने, संकलित तरकारीलाई प्याकेजिङ गर्ने र उपभोक्ताको घरघरमा पुऱ्याउने काम भ्याइनभ्याई छ । आफूहरूले टोलटोल पुगेर बिक्री गर्ने तरकारी बजारमूल्यभन्दा ३० प्रतिशतसम्म सस्तो पर्ने दाबी उनीहरूको छ । किसान प्रचण्ड प्रधानले कालिमाटीको तरकारी बजारको मूल्यलाई आधार बनाई हरेक दिन कृषकबाट तरकारी किनेर ढुवानी र ज्याला खर्च थप गरी सीधै उपभोक्ताकोमा पुऱ्याउने गरेको बताए ।
‘भक्तपुरका कृषकले उत्पादन गरेका तरकारी हामी संकलन गर्छौं,’ उनले भने, ‘सय–पचास कतिकति हुन्छ । हाम्रो ढुवानी भाडा पनि जोड्छौँ ज्याला पनि जोड्छौँ । अनि खुद्रा पैसाको जोहो गर्न नपर्ने गरी ठिक्क पचासको–सयको प्याकेट बनाउँछौँ ।’
खेर जाने हरियो तरकारीमा २५ देखि ३० र खेर नजाने आलु प्याजमा १० देखि १२ प्रतिशत नाफा राखेर यी युवाले उपभोक्ताको हातसम्म तरकारी पुऱ्याउने गरेका छन् । उनले अहिले चाँगुनारायण र सूर्यविनायक नगरपालिका तथा वडाका पदाधिकारीसँग समन्वय गरेर तरकारी टोलटोलमा पुऱ्याउने गरिएको पनि बताए । लकडाउनको निर्णयसँगै किसानको तरकारी बारीमा नै कुहिने, उपभोक्ताले खान नपाउने परिस्थिति उत्पन्न भएपछि यस्तो अवधारणा विकास भएको अर्का अगुवा कृषक कुलबहादुर नेमाफुकीले बताए ।
तरकारी बोकेको गाडी स्थानीय पदाधिकारी र स्वयंसेवकहरूसँगको समन्वयमा टोलटोलमा पुग्छ । अनि १–१ मिटरको दूरीमा रहेका उपभोक्तालाई प्याकेजिङ गरेको तरकारी दिने गरिन्छ । बिहान–साँझ उपभोक्ताको घरघरमा पुऱ्याउने तरकारी वितरणमा पनि यो समूहले थप सतर्कता अपनाएको छ । तरकारीमा विषादी छर्दा लगाउने रेनकोटजस्तो पोसाक, पन्जा, मास्क लगाएर तरकारी वितरण गर्ने गरिन्छ ।
अगुवा कृषक प्रेमनारायण अधिकारीले टोलटोलमा तरकारी पुऱ्याउने कामले किसानले पाउने मूल्य र उपभोक्ताले तिर्नुपर्ने मूल्यबीचको अन्तरलाई कम गर्नुको साथै दुवै पक्षलाई फाइदा पुगेको बताए ।
तरकारी टोलटोलमा पुऱ्याउने कामको नेतृत्व गरेको जिल्ला कृषि सहकारी संघका अध्यक्ष शनिस लागेजूले संकटलाई अवसरको रूपमा लिएर काम गर्नुपर्ने निष्कर्षका साथ उपभोक्ताको हातहातमा तरकारी पुऱ्याउने काममा जुटेको बताए । कोरोना भाइरसको संक्रमणको त्रास सर्वत्र भइरहेका वेला अन्य कर्मचारी राख्दा आउन सक्ने समस्या र टीकाटिप्पणीका कारण संस्थाका अध्यक्षदेखि पदाधिकारी आफैँ नै यो काममा खटिएको उनले बताए ।