शिक्षक र कर्मचारीको तलबबाट १२ लाख विपत् कोषमा जम्मा
पर्वतको फलेबास नगरपालिकामा कार्यरत शिक्षक र कर्मचारीले आफ्नो तलबबाट कटाएर १२ लाख रुपैयाँ रकम विपत् कोषमा जम्मा गरेका छन् । पालिकामातहतका विभिन्न कार्यालय तथा विद्यालयमा अध्यापनरत शिक्षकले आफ्नो तलबबाट विपत् कोषका लागि उक्त रकम उपलब्ध गराएका हुन् ।
नगरपालिकाभित्र काम गर्ने सरकारी सेवाका कर्मचारीले तीन दिनबराबरको तलब र शिक्षकले दुई दिनबराबरको तलब विपत् कोषमा उपलब्ध गराएका हुन् । फलेबासमा शिक्षक र कर्मचारी गरी करिब आठ सयजनाबाट उक्त रकम संकलन भएको नगरपालिकाल जनाएकाे छ ।
यसअघि फलेबास नगरपालिकाले विपत् कोषका लागि ३५ लाख रकम जम्मा गरिसकेको छ भने शिक्षक–कर्मचारीबाट संकलित १२ लाखसमेत गरी ४७ लाख रुपैयाँ विपत् कोषमा पुर्याएको छ ।
पालिकाले अन्य सहयोगी दाताहरूसँग पनि सहयोग गर्न आह्वान गरेको नगरप्रमुख पदमपाणि शर्माले जानकारी दिए । उनका अनुसार सहयोग आउने क्रम जारी छ । कोषमा एक करोड पुर्याउने लक्ष्य लिएको र कोरोना प्रभावितका लागि राहत वितरण गर्न मापदण्डसमेत बनाएर अघि बढेको उनले बताए ।
फलेबास नगरपालिकाले कोरोना भाइरसको संक्रमण रोकथामका लागि दुई सय १२ क्वारेन्टाइनसमेत निर्माण गरेको छ । हालसम्म फलेवासमा तीनजना पुरुष मात्र क्वारेन्टाइनमा छन् ।