कोरोना भाइरसबाट मृत्यु भएकाको सम्झनामा चीनले शोक मनायो
चीनमा कोरोना भाइरसका कारण मृत्यु भएकाहरूको सम्झनामा शनिबार बिहान मौनधारण गरिएको छ ।
स्थानीय समयानुसार बिहान १० बजेदेखि ३ मिनेटसम्म मौनधारण गरिएको थियो । कार्यक्रममा राष्ट्रपति सी जिनपिङलगायतका विशिष्ट व्यक्तिको पनि सहभागिता थियो ।
मौनधारणमा सहभागीहरूले मृतकको सम्मान र सम्झना गरेको अधिकारीहरूले जनाएका छन् । मौनधारणका वेला सबै सवारीसाधन जहाँको तहीँ रोकिएका थिए भने राष्ट्रिय झण्डा झुकाइएको थियो ।
मौनधारण कार्यक्रम चीनबाहिर रहेका कूटनीतिक निकायमा समेत गरिएको थियो । यस कार्यक्रममा करोडौँ व्यक्ति सहभागी रहेको समाचारमा जनाइएको छ ।
गत डिसेम्बरको अन्त्यबाट चीनको हुबेई प्रान्तको वुहान सहरबाट फैलिएको कोरोना भाइरसको सङ्क्रमणका कारण चीनमा तीन हजार तीन सय २६ जनाको मृत्यु भइसकेको छ । यस भाइरसबाट ८१ हजारभन्दा बढी व्यक्ति सङ्क्रमित भएका थिए । जसमध्ये ७५ हजारभन्दा बढी निको भइसकेका छन् ।
कोरोना भाइरसको सङ्क्रमणबाट चीनमा १४ जना स्वास्थ्यकर्मीले पनि ज्यान गुमाएका छन् ।
चीनमा दिवंगत मान्छेको सम्झना गरिने चिन्मिङ पर्वको अवसर पारेर सरकारले मौनधारण कार्यक्रम तय गरेको बताइएको छ ।