कोरोना भाइरस (कोभिड– १९)को संक्रमण रोकथामका लागि सरकारले लगाएको लकडाउन उल्लंघन गरी नेपालबाट हिँडेका भारतीय नागरिकलाई प्रहरीले वीरगन्जको ठाकुरराम बहुमुखी क्याम्पसको भवनमा राखेको छ ।
पर्सा प्रहरीले नेपालको विभिन्न स्थानबाट भारत फर्किँदै गरेका तीन सय ५२ जना भारतीय नागरिकलाई नियन्त्रणमा लिएर क्याम्पसको शिक्षा संकायको भवनमा राखेको हाे ।
मंगलबार राति विभिन्न स्थानबाट उनीहरूलाई नियन्त्रणमा लिएर राखिएको पर्साका प्रहरी प्रवक्ता प्रहरी नायव उपरीक्षक वीरेन्द्रबहादुर शाहीले बताए ।
शौचालय जान नपाएपछि होहल्ला
मंगलबारदेखि प्रहरीको नियन्त्रणमा रहेका भारतीय नागरिकले खाना, पानी र शौचालय जानसमेत नपाएको भन्दै होहल्ला गर्ने गरेका छन् । प्रहरीले नियन्त्रणमा लिएर क्याम्पस भवनको भित्र च्यानल गेट लगाएर राखेपछि कुनै अपराध नगरे पनि कैदीबन्दीलाई जस्तो व्यवहार गरेको भन्दै उनीहरूले होहल्ला गरेका हुन् ।
प्रहरीको नियन्त्रणमा रहेका एक सय ५२ मध्ये एक सय ४० जनालाई शिक्षा संकायको भवनको च्यानल गेटभित्र राखिएको छ । बाँकी महिला र बालबालिकालगायत १०/१२ जना क्याम्पसपरिसरको खुला चौरमा छन् ।
जिल्ला प्रशासन कार्यालय पर्साका सहायक प्रमुख जिल्ला अधिकारी तथा सूचना अधिकारी ललितकुमार बस्नेतले गएरातिदेखि नै प्रहरीले नियन्त्रणमा लिएर राखेकाहरूको विषयमा जिल्ला प्रशासन कार्यालयमा जानकारी नआएको बताए । उनले भारतीय नागरिकलाई नियन्त्रणमा लिएर ठाकुरराम बहुमुखी क्याम्पसमा राखेको जानकारी आफूलाई बुधबार मात्र भएको बताए ।
मंगलबारदेखि क्याम्पसको भवनमा प्रहरी नियन्त्रणमा रहेका भारतीय नागरिकलाई प्रहरीको समन्वयमा ग्रिनसिटी सामुदायिक केन्द्र आदर्शनगरले बुधबार दिउँसो पानी र चाउचाउ वितरण गर्नुका साथै एक छाक खाना खुवाएको छ ।