नेकपा अध्यक्षद्वय प्रधानमन्त्री केपी शर्मा ओली र पुष्पकमल दाहाल प्रचण्डबीच बुधबार अपराह्न डेढ घन्टा कुराकानी भएको छ ।
कोरोना भाइरस संक्रमण र त्यसको महामारी फैलन नदिने विषयमा अध्यक्षद्वयबीच कुराकानी भएको हो । अध्यक्ष प्रचण्डका प्रमुख स्वकीय सचिव गंगा दाहालका अनुसार अध्यक्षद्वयबीच तीन विषयमा छलफल भएको थियो ।
अध्यक्षद्वयबीच कोरोनो भाइरस जाँचका लागि चीनबाट ल्याइएका स्वास्थ्य उपकरण खरिदमा भएको अनियमितताका सम्बन्धमा उठेका चर्चा, दार्चुलालगायतका जिल्लाका सीमा क्षेत्रबाट स्वदेश प्रवेश गर्न खोजेका आमनेपालीले भोग्नुपरेका समस्या र लकडाउनका कारण पेट पाल्न मुस्किल परिरहेका श्रमिक मजदुरलाई राहत दिने विषयमा छलफल भएको हो ।
‘अध्यक्षद्वयबीच अत्यन्त सकारात्मक कुरा भएको छ,’ स्वकीय सचिव दाहालले नयाँ पत्रिकासँग भनिन्, ‘देखिएका समस्या तत्काल समाधान गर्ने निर्णय दुवै अध्यक्षले गर्नुभएको छ ।’